Kominike Lapolis |09 May 2026
En zonm aze 29-an sorti Kan Per dan distrik Baie Ste Anne, Praslin in pas devan Lakour Mazistra Mahé yer bomaten kot in ganny rimann pour 14 zour andetansyon lapolis. Sa i an relasyon avek en ka ki lapolis pe fer lanket ladan pour lofans azir dan en fason iresponsab e neglizans, kot dife ti bril en gran ektar lafore lo latet montanny Baie Ste Anne Praslin le 6 Me 2026.
Dapre rapor inisyal ki lapolis ti’n ranmase, sa sispe ti pe kwi manze lisyen deor lo dife kot, a en moman donnen, i ti’n kit landrwa. Ler i ti retournen i ti apersevwar ki dife ti’n deza esape e propaz ver lafore.
Lapolis ti ganny alerte konsernan sa dife le 6 Me 2026 ver 4er 35 apremidi pour lasistans.
******
Lapolis in reisi idantifye sa sispe ki ti pe ganny rode an koneksyon avek en video ki ti pe sirkile lo rezo sosyal, kot en fiy ti ganny agrese.
Swivan lanket, apre ki sa sispe in ganny entervyou, lapolis in etabli ki sa lensidan ti arive an 2024 apre en konser mizikal dan rezyon lavil, kot sa sispe ti annan 14-an sa letan. I enportan pour note ki sa pa en lensidan ki’n fek arive.
Antretan, lapolis pe kontinyen avek son bann prosedir an koneksyon avek sa rapor e pe demann viktim dan sa ka pour pran kontak avek seksyon CID Santral atraver 4288055. Departman Lapolis i oule remersye tou dimoun ki’n ede dan en fason ou en lot avek bann lenformasyon kredib ki’n fer ki sa sispe in kapab ganny idantifye.