En zonm i ganny dimal pandan travay |20 September 2025
Lapolis in konfirmen ki en zonm 30-an ti ganny transporte Lopital Sesel pour swen medikal dirzans yer bomaten, swivan en lensidan ki’n arive Plaisance.
Dapre en kominike lapolis, sa zonm ti sibir blesir grav lo plizyer parti son lekor pandan ki i ti pe fer en travay. Zot ti ganny alerte lo sa lensidan ver 10er 25.
Dapre lenformasyon ki Seychelles NATION in resevwar avek stasyon televizyon Télésesel ki ti kot landrwa kot sa lensidan ti arive, sa zonm ti pe koup en barik dan en landrwa rezidansyel, letan ti annan en leksplozyon. En temwen i dir i ti vwar li tonbe e sa barik pe pran dife.
Servis dirzans ki enkli Lazans Servis Tenny Dife ek Sovtaz, lapolis ek lanbilans ti vitman ariv lo sit pour donn lasistans. Lapolis in konmans en lanket dan sa lensidan.
Lartik Patsy Canaya/Télésesel/Kominike lapolis
Portre: Télésesel