Kominike Lapolis |26 August 2025
Kominike Lapolis
En zonm i sibir dimal grav dan en aksidan
En zonm 49-an sorti Côte d’Or, Praslin in admit dan younit swen entansif Lopital Sesel dan en leta kritik.
Sa i an rezilta en aksidan ki’n arive dan zanmerant Marie Jeanne Estate le 23 Out 2025. Lapolis in konmans en lanket detaye dan sa ka pour etabli lakoz otour sa aksidan.
*******
En zonm Sid Afriken i ganny sarze pour lofans drog
Kenton Weisner aze 24-an avek nasyonalite Sid Afriken in pas devan Lakour Siprenm yer bomaten kot in formelman ganny sarze pour lofans lenportasyon en drog kontrole.
Weisner ti ganny entersepte par zofisye ladwann ek lapolis lo erport enternasyonal Sesel le 8 Out 2025, apre son larive abor en vol Air Seychelles sorti Johannesburg. Lapolis ti sezi 17805.20 granm kanabis zerbaz dan son posesyon. Lakour in rimann sa akize an detansyon lapolis pour ankor 14 zour.
*****
En zonm Britanik i rimann dan lanket pour lofans drog ilegal
En zonm 27-an avek nasyonalite Britanik in pas devan Lakour Siprenm yer bomaten kot in ganny rimann 14 zour andetansyon lapolis. Sa i an koneksyon avek en lanket ki lapolis pe fer kont sa sispe pour lofans lenportasyon en drog kontrole, konplo pour enport en drog kontrole e konplo pour trafik en drog kontrole.
Sa sispe ti ganny entersepte par zofisye ladwann ek lapolis lo erport enternasyonal Sesel apre son larive abor en vol sorti Addis Ababa le 22 Out 2025, kot lapolis ti sezi plizyer pake ki zot soupsyonnen i kontenir en drog kontrole.