Kominike Lapolis |19 August 2025

En seksyon semen Mont Fleuri pou fermen ozordi ek Zedi

Lapolis pe enform mann piblik ki en morso semen dan Mont Fleuri pou fermen ozordi, Mardi le 19 Out ek Zedi le 21 Out 2025, depi 8er 30 bomaten ziska tar aswar.

Sa morso semen ki pou fermen i depi ronpwen Mont Fleuri (anfas laboutik Weeling) ziska krwaze semen Lopital Sesel.

Sa morso semen pou fermen sa de zour akoz prosedir nominasyon kandida prezidansyel (ozordi) ek candida Lasanble Nasyonal (Zedi) ki pou fer kot Biro Komisyon Eleksyon.

Motoris i ganny ankouraze pour servi larout alternativ atraver Bois de Rose pour ariv kot zot destinasyon.

Lapolis in fer provizyon adisyonnel pour bann bis piblik. Bis ki sorti Mont Fleuri pour al ver lavil pou kapab debark pasaze dan layby akote Lekol Franse. Pasaze ki pe al direksyon Lopital i kapab servi semen Danielle De St Jorre, akote Lekol Franse, ki mont ver Batiman Botanik, Mont Fleuri.

Pou annan zofisye lo ronpwen Le Chantier ki al ver Mont Fleuri e dan krwaze semen Bel Eau ek Lopital Sesel pour kontrol trafik

Parking pour bann kandida Prezidansyel pou sitiye anndan kot Minister Ledikasyon.

Lapolis pe lans en lapel avek tou parti politik ek zot sipoter ki pe ekspekte prezan ki pou annan en landrwa spesifik ki’n ganny dezinyen kot siporter pou kapab rasanble. 

Lapolis pe demann tou dimoun pour gard en bon konportman e respekte lezot, evite provok kanmarad ki kapab koz bann aksyon vyolans.

I enportan pour note ki konsonmasyon lalkol dan landrwa piblik i en lofans e pa pou ganny tolere.

Lapolis pe demann korperasyon tou motoris, siporter ek bann parti politik pour asire ki prosedir nominasyon bann kandida i deroul dan lape e dan lord.