Kominike Lapolis |17 May 2025

Lapolis i fer lanket dan lanmor en zonm 59-an

Lapolis in konmans en lanket pandan ki zot pe esper rapor letopsi pour etablir sirkonstans otour lanmor en zonm 59-an sorti Mont Buxton, ki ti’n ganny dekouver pa pe reazir kot son lakour yer apremidi.

Dapre rapor inisyal ki lapolis in ranmase, sa zonm ti’n ganny vwar vivan pour dernyen fwa Merkredi le 14 Me 2025. Lapolis ti ganny alerte lo sa dekouvert ver 4er 50 apremidi pour lasistans.

******

Rimann i andomaz kordgard Baie Lazare

Lapolis in konfirmen ki kordgard Baie Lazare ti bezwen fermen tanporerman pour loperasyon Merkredi swar. 

Sa ti swivan en lensidan kot en rimann kot sa stasyon ti andomaz serten lenfrastriktir dan sa kaso. An rezilta sa, delo ti’n koul dan sa stasyon. Sa rimann ti’n ganny transfer kot sa stasyon apre ki i ti’n andomaz serten lenfrastriktir dan kaso Anse Royale pli boner. 

Lapolis i fortman kondann bann tel aksyon parey ki’n arive, e pa pe toler okenn aksyon kot en deteni swa rimann i andomaz okenn propriyete leta dan bann batiman lapolis. Sa rimann ti ganny arete le 12 Me 2025 Anse Aux Pins an koneksyon avek en ka vol ki ti arive lo lans Anse à la Mouche. 

Sa sispe i ekspekte repas devan Lakour le 27 Me 2025, pour sa ka vol, kot i osi ekspekte ganny sarze avek 3 nouvo lofans. Sa i pour andomaz propriyete ek konportman dezordonnen dan en batiman lapolis.