Mesaz Minis Lasante Peggy Vidot pour Lazournen Mondyal Lasante le 7 Avril |07 April 2025
Minis Lasante Peggy Vidot
«Pran ka avek zot lasante»
«Komemorasyon Lazournen Lasante Mondyal, le 7 Avril, sa lannen, i met latansyon lo lasante bann manman ek zanfan. Tenm ki’n swazir se ‘En konmansman an bonn sante, Lespwar pou lavenir’. Sa tenm i met lanfaz lo ki mannyer lasante bann manman ek zanfan i primordyal pour asir lavenir en pep ki an bonn sante. Nou sistenm lasante i totalman aksesib a bann madanm avan, pandan e apre ki zot ansent.
«I nou lafyerte ki nou to mortalite pour bann madanm ki ansent e pour bann ti baba avan enn an, i reste vreman ba konpare avek plizyer pei dan lemonn. Mon felisit, pa zis tou bann madanm ek bann msye, me osi bann saz-fanm ek dokter ki met zefor ansanm pour fer ki laplipar bann lakousman, zot termin dan lazwa e zot ranpli boner dan lafanmir.
«Toulezour, nou pe fer plis e plis progre lo size akse avek servis lasante. Mon fyer pour anonse, ki bann madanm ansent ki reste dan rezyon santral aprezan zot gany sa servis ekskliziv e spesyalize kot Lopital Persévrance. Avan zot ti bezwen al sant lasante Larivyer Anglez, ansanm avek tou lezot pasyan ki annan diferan bezwen lasante, pour zot kapab ganny servis relye avek zot lasenntman. Sa amelyorasyon i redwir zot letan espere e i donn zot plis letan avek bann profesyonnel ki pe pran ka avek zot.
«Nou pe kontinyen fer zefor pour fasilit servis raprose, parey sa enm, pour tou nou bann madanm. An retour nou demann bann madanm pour fer zot bout, zot osi. Pran ka avek zot lasante. Pran ka pa zis ler zot ansent, me tou dilon zot lavi. Vey byen sa ki zot bwar e sa ki zot manze. I enportan pour nou kontiyen edik nou popilasyon lo danze lalkol pandan lansentman. Ozordi i rekonmande ki en madanm pa konsonm ditou lakol pandan lansentman akoz sa i kapab afekte son baba a kour term e a lon term.
«I osi vreman enportan ki tou dimoun i rekonnet zot rol pour donn tou zanfan ki ne en bon komansman e asir en lavenir ranpli avek lespwar. I pa zis responsabilite Minister Lasante, me osi devwar tou sekter e sirtou tou dimoun dan kominote. En bon komansman an bonn sante i pa zis ler baba i ne, me sa ki arive avek li dan lakour, dan vwazinaz, lo semen, dan lekol e partou. Nou fer tou zefor pour ki en baba i an bonn sante, me son lavenir i depann lo sa swen e lanmour ki paran i donn li, sa nouritir ki i ganyen, lekzanp ki paran i donn li e sa lanvironman kot i grandi.
«Pour bann travayer lasante ki pe selebre zot lazournen, nou apresye sa devouman ek sakrifis ki zot mete dan zot louvraz. Mon remersye e aplodi zot servis. Nou bezwen kontinyen soutenir zot developman. Nou bezwen kontinyen rod sipor ek louvertir pour zot developman edikasyonel ki pou ede amelyor zot lekor e zot performans.
«Finalman, mon soulinyen ki Minister Lasante pou kontinyen ankouraz lasante piblik e asire ki pa zis bann manm piblik, me osi bann travayer lasante, zot reste touzour an bonn sante. Mon swet zot tou, bonn sante a lokazyon Lazournen Lasante Mondyal e pour lavenir.»