Kominike Lapolis |26 February 2025
De zonm i ganny sarze dan en ka vol La Digue
Andrew Lesperance aze 28-an ek Jules Bibi aze 34-an in formelman ganny sarze devan Lakour Mazistra Praslin dan en ka vol ki’n arive resaman lo La Digue.
Toulede akize zot sorti La Passe, La Digue e zot pa dan en lanplwa.
Mazistra ki ti pe ekout sa ka, in larg Lesperance lo sa bann kondisyon swivan – pour pey en kosyon 3 mil roupi e pour pa komet okenn lofans similer pandan letan ki i pou deor lo laliberte provizwar. E Jules Bibi li in ganny large lo en ‘bail bond’ 6 mil roupi, pour pa komet okenn lofans similer pandan letan ki i deor lo laliberte provizwar, pour siny liv lakour dan kordgard La Digue tou le Mardi avan 6er diswar.
Vi ki Lesperance pa’n reisi akord demann lakour pour pey sa kosyon 3 mil roupi, i’n ganny rimann an detansyon lapolis.
Sa 2 akize zot ekspekte repas devan Lakour Mazistra Praslin ozordi Merkredi le 26 Fevriye 2025.
******
En Ostralyen i admit Lopital Sesel swivan en lensidan dan lanmer
En zonm 67-an avek nasyonalite Ostralyen in admit Lopital Sesel anrezilta en lensidan kot i ti’n ganny tape avek laroul pandan letan ki i ti lo lans Anse Georgette, Praslin tar Lendi swar. Son kondisyon in ganny dekri konman stab.
*******
En zenn-onm 19-an i enplike dan en aksidan scooter
En zenn-onm 19-an sorti Perseverance ti ganny trete Lopital Sesel e apre plitar ganny large Lendi swar an rezilta en aksidan ki ti arive North East Point.
Dapre rapor inisyal ki lapolis in ranmase, sa zenn-onm ki ti pe mont en scooter e ti pe fer direksyon lavil, ti fer kolizyon avek 3 transpor avan al tap dan en miray akote semen.
Lapolis ti ganny alerte lo sa aksidan ver 6er 55 diswar.
En lanket in konmanse dan sa ka.