Kominike Lapolis |16 October 2024
10 zonm i ganny sarze pour met dife e fer rayot kot sant rimann Bois De Rose
10 zonm ki ti lo rimann in formelman ganny sarze devan Lakour Siprenm Lendi bomaten pour met dife dan en batiman e fer rayot.
Sa i an relasyon avek lensidan le 24 Out 2024 kot sant rimann Bois De Rose kot dife ti ganny mete entansyonnelman, apre ki serten lafouy ti’n ganny fer pli boner kot sa sant.
De zonm sorti Belonie – Valentino Hoareau (26-an) ek Steven Hoareau (25-an) – in ganny sarze pour lofans met dife dan en batiman e fer rayot.
Tandis ki Abdul Aswad (42-an) Barbarons, Darrel Labiche (37-an) Les Mamelles, Michel Athanase (41-an) Baie St Anne Praslin, Ralph Zaphet (51-an) Anse Royale, Tieno Biscornet, Belonie, Mervin Zarine (28-an) Ma Constance, Joshua Malbrook (31-an), Ian Labrosse (28-an) sorti Perseverance, zot in ganny sarze pour lofans fer rayot.
Lapolis atraver prosekisyon ti anmenn en mosyon devan lakour pour demande ki sa bann akize i ganny garde an detansyon lapolis. Ziz ki ti pe ekout sa ka in akord demann prosekisyon e ordonnen ki sa bann akize i ganny rimann Prizon Montagne Posée. Sa ka pou repas devan Lakour Siprenm le 28 Oktob 2024, 9er bomaten.
******
Lakour Siprenm i prolonz rimann 4 zonm dan lensidan dife sant rimann le 6 Oktob
Antretan dan en lot lensidan dife kot sant rimann Bois De Rose le 6 Oktob, 2024, Lakour Siprenm in prolonz rimann 4 zonm apre ki zot ti pas devan lakour Lendi.
Sa bann sispe i en zonm 39-an sorti Perseverance, en zonm 42-an sorti Petit Paris, en zonm 32-an sorti St Louis ek en zonm 32-an sorti Cascade.
******
Dario Joubert i ganny sarze pour kas lakaz e vole
Dario Joubert aze 20-an sorti Les Mamelles in formelman ganny sarze devan Lakour Mazistra Anse Royale. Sa i dan en ka kas lakaz e vole ki ti raporte avek lapolis le 5 Oktob 2024 ver 6er 48 bomaten.
Lefe ki i deza annan ka kont sa akize e ki i ti osi fek ganny large prizon le 7 Septanm, 2024, lapolis atraver prosekisyon ti demande ki i reste lo rimann.
Mazistra ti akord demann prosekisyon ki fer ki sa akize pe ganny detenir prizon Montagne Posée ziska le 29 Oktob 2024, zour ki i ekspekte repas devan lakour.
******
En zonm i an detansyon swivan vol lo en laferm Petit Barbarons
En zonm 44-an ki pa anploye sorti Caiman, Anse Boileau, i lo rimann an relasyon avek en ka vol lo en laferm Petit Barbarons le 12 Oktob 2024, kot i ti osi bles de zonm ki ti pe esey entersepte li.
Lapolis in sezi serten levidans dan son posesyon.
I lo rimann ziska le 24 Oktob 2024, zour ki i ekspekte repas devan lakour.
******
En zenn-onm 19-an i sispe pour vol scooter
En zenn-onm 19-an sorti Fôret Noire i lo rimann pour set zour konman sispe dan 4 ka vol scooter, ki ti ganny raporte avek lapolis pandan mwan Septanm 2024. Sa ti arive dan rezyon Anse Etoile. Sa sispe pou repas devan Lakour Mazistra le 21 Oktob 2024.