Kominike Lapolis |07 June 2023
Naelle Albert i absant lakour son paran depi le 2 Zen
Naelle Albert aze 14-an sorti Ma Joie silvouple pran kontak avek ou fanmiy irzan oubyen raport kot okenn stasyon lapolis pli pros.
Naelle in kit lakour kot i ti pe reste depi Vandredi le 2 Zen 2023 ziska prezan son fanmiy pa konnen kote i ete.
Lapolis pe demann nenport endividi ki konnen oubyen annan lenformasyon lo kote Naelle Albert i kapab ete pour kontakte kordgard santral lo 4288055 oubyen son sant komann lo 4288000, 999 ou 133 irzan.
*****
En zonm 27-an i rimann an koneksyon avek en ka labi seksyel
En zonm aze 27-an sorti Zimbabwe, Praslin ki travay konman en zournalye, in ganny rimann an detansyon lapolis ziksa le 16 Zen 2023 zour ki i ekspekte repas an kour.
Sa zonm i sispe dan en ka labi seksyel kont en miner ki lapolis pe fer lanket ladan raporte arive le 5 Zen 2023.
****
En zonm i ganny sarze pour plizyer lofans vole kot en letablisman touristik
En zonm aze 45-an sorti Mont Plaisir dan distrik Anse Royale in formelman ganny sarze devan Lakour Mazistra dan en ka kas lakaz e vole ki ti ganny raporte avek lapolis le 21 Me 2023 arive pandan lannwit kot en letablisman touristik Anse Louis dan distrik Anse Boileau.
Mazistra in larg sa aprezan akize lo serten kondisyon kot i pou bezwen pey en lanmann 20 mil roupi pour son laliberte provizwar, e si i arive peye i pou ganny large, i pa merit komet ou ganny sarze avek okenn lofans pandan letan ki i deor, fer sir ki i prezan a tou moman an kour ler son bann ka pe ekoute, raport kordgard Anse Royale toulezour pour vin siny liv lakour e en kouvrefe depi 7er diswar ziska 6er bomaten.
Sa akize pa’n reisi akord demann lakour ki fer i aprezan ganny rimann prizon Montagne Posée ziska le 16 Zen 2023 zour ki i ekspekte repas an kour.
*****
En sispe i ganny sarze pour plizyer lofans kas loto e vole
En zonm aze 33-an ki pa dan lanplwa e i sorti Persévérance in formelman ganny sarze devan Lakour Mazistra dan 2 ka vole dan transpor e 1 ka andomaz propriyete ki ti ganny raporte avek lapolis le 22 Me 2023.
Mazistra in larg sa aprezan akize lo plizyer kondisyon pour son laliberte provizwar tel ki pey en lanmann 9 mil roupi ki in fini peye, pour remet son paspor avek lakour, raport kordgard 3 fwa par semenn, en kouvrefe depi 6er diswar ziska 6er bomaten, pour pa komet ou ganny sarze avek okenn lofans pandan letan ki I deor lo laliberte provizwar. E osi prodwir 2 dimoun konman garanti 5 mil roupi dan son bann ka.
Apre ki sa akize ti’n ganny large lo bann kondisyon, le 1 Zen 2023 i ti al vole dan en transpor. Sa sispe ti reganny arete e anmenn an kour kot lapolis atraver prosekisyon ti fer en mosyon ki sa sispe ti’n kas kondisyon ki lakour ti’n enpoz lo li dan son bann ka avan e demande ki i ganny garde lo rimann.
Mazistra in akord demann lapolis atraver prosekisyon ki sa sispe i ganny rimann prizon Montagne Posée ziska le 15 Zen 2023 zour ki i ekspekte repas an kour.
Mazistra in osi fer lord ki sa 2 dimoun ki’n garanti sa zonm 5 mil dan ka sa sispe pou bezwen pey lakour zot 5 mil roupi sakenn e son kosyon 9 mil roupi ki i ti’n peye pou aprezan ganny sezi vi ki in kas kondisyon ki lakour ti’n enpoz lo li.
Michel Boniface i katriyenm viktim aksidan fatal pour sa lannen
Lapolis ti rikord en katriyenm aksidan fatal Lendi swar. Viktim sa aksidan fatal i en zonm aze 76-an apele Michel Boniface sorti Baie Lazare ki ti en pyeton.
Drayver sa bis prive ki pour en lankonpannyen i en zonm aze 62-an sorti Pointe Larue e in ganny arete e detenir kot in pas an kour yer apremidi. Lakour in larg sa sispe lo plizyer kondisyon tel ki remet son kart laysenns e paspor avek lakour, pey en kosyon 8 mil roupi pour son laliberte provizwar e osi pour vin siny liv lakour kot kordgard Anse Aux Pins. Sa sispe pa ankor fer peyman sa kosyon ki fer in ganny garde an detansyon lapolis ziska ki i fer sa peyman pour li kapab ganny large.
Sa bis ti pe fer direksyon Ile Du Port an sortan ver lavil letan ki sa viktim ti ganny tape. Lapolis ti ganny alerte lo sa aksidan ver 6er30 diswar e en lanket in konmanse pour etablir sirkonstans otour sa aksidan.
Kominike sorti kot departman lapolis