Kominike Lapolis |28 March 2023

En zonm i mor swivan en aksidan Vandredi

Lapolis in rikord dezyenm aksidan fatal pour sa lannen. I’n konfirmen ki sa zonm 27-an sorti Green Estate, Au Cap e ki ti’n admit dan younit swen entansiv lopital Sesel in mor yerapremidi.

Sa zonm ti ganny tape par en transpor Vandredi swar dan zanmerant Casuarina.

Antretan lapolis pe kontinyen avek zot lanket dan sa ka.

*******

En madanm etranze i ganny arete pe rantre avek drog dan pei

En madanm Nizeryen aze 52-an pe ganny detenir swivan son larestasyon lo erport enternasyonal Pointe Larue Zedi le 23 Mars apre son larive lo en vol sorti Letyopi.

Larestasyon sa madanm ti vin swivan lafouy, dekouvert ek lasezi anviron 250 granm, ki soupsyonen i drog kontrole kokain, lo sa sispe par zofisye lapolis.

Sa sispe ki ti ganny anmenn ankour Vandredi le 24 Mars e ki’n ganny rimann ziska le 6 Avril, pe fer fas avek sarz pour lofans lenportasyon, konplo pour enport e trafik en drog kontrole.

Lanket dan sa ka i kontinyen.

Kominike sorti kot departman lapolis