Sesel i dir adye santer David Scholastique |14 November 2022
David Scholastique
Sesel in semenn pase dir orevwar enn bann gran santer, mizisyen, konpoziter koni dan Sesel, David Scholastique, en lanmor ki’n relev bokou bon souvenir karyer mizikal sa santer aze 72-an, ne le 24 Zilyet 1950.
David i renonmen pour bann sanson tel ki ‘Si demen nou separe’, ‘Selibater’, ‘Dan lakour’, ‘Mon pous mon pirog’, ‘Vals vwayazer’ e ‘Portre ou Zoli Portre’.
Me premye sanson sa santer ti konpoze e sante letan i ti annan selman 18-an e sa se ‘Pa Plere, Mon pe Ale’. Sa letan i ti enn bann manm fondater group tre popiler ‘Wreckers’, ki ti perform plito kot Bamboo Night Club.
‘Wreckers’ ti sanz non pour vin ‘Still Waters’ an 1973, ‘kot zot son ti rezonnen dan ban landrwa popiler tel ki Reef Hotel, Coral Strand e Fisherman’s Cove. David Scholastique ti apre vann son par dan ‘Still Waters’ e deside al prodwi son premye albonm, kot la i ti akonpannyen par Harry Prempeh and the ‘Volta Sounds’.
Milye dan bann lannen 1970, David ti deside form son prop benn apele ‘The Palmiers’ ansanm avek bann manm inisyal Guy Marie, François Havelock, Robert Agrippine e Gabriel Coeur-de-Lion.
Seychelles NATION ti koz avek son koleg mizisyen, zanmi e osi manm fondater ‘Les Palmiers’, Guy Marie ki dekrir David Scholastique konman en zonm personnel, senp, bon ker, ki pa mazin ditor pour son prosen, e toultan gard lespri okipe.
«I ti toultan annan keksoz dan lespri, menm si i pe marse dan semen, ou i pe asize li tousel, i pe bezwen mazin en keksoz. E i ti kontan zwe avek son seve toultan pour tourn son bout seve e fer lide, i annan keksoz i pe al fer,» Guy Marie ti dir.
Son sanson prefere sa santer Seselwa se ‘Selibater’ ek ‘Pous mon Pirog’ akoz sirtou pour son laranzman mizikal ek parol.
«Ler David ti fer sa sanson ‘Vwayazer’ i pa’n zis fer sa koumsa menm. I ti anvi vwayaze. Bann keksoz ki i fer i anvi vin dan son bann sanson li,» dapre Msye Marie.
Group ‘The Palmiers’ ti vin sitan popiler sa letan ki i ti perform pandan lasemenn annantye. Pandan zot performans zot ti osi anmenn Ton Pa ek Ton Boboy, ki renonmen pour zwe lenstriman mizikal tradisyonnel, bonm ek zez. Msye Marie i dir ki David Scholastique ti premye dimoun pour anmenn Ton Pa ek Ton Boboy pour performen.
David Scholastique i osi koni pour entrodwir benn kanmtole Anse Boileau apele ‘Rasin’ dan bannn lotel e fer kliyan eksperyans pour premye fwa bann morso tel ki mazok, kotis, ek lezot ki tre popiler.
Sa mizisyen ti sa letan okip de benn, fer performans kanmtole dan Dimans e dan Sanmdi son benn ti mont spektak dan lotel Beau Vallon Bay. Son group ti osi fer show kabare.
Touzour dan milye bann lannen 1970, David Scholatique ti osi annan son prop ‘recording label’ apele ‘Dasco Records’, e osi propriyeter en pti laboutik souvenir Beau Vallon kot i ti vann son bann rikord.
Boner an 1980 i ti mizisyen prensipal pour perform kot lotel Equator e Barbarons Hotel.
Enn son bann sikse ki’n fer li fyer se loportinite pour perform sanson prensipal dan en film dokimanter Omar Sheriff, apele ‘Return to Eden’.
An 2001 a 2003, i ti perfrom dan diferan landrwa Lonn, Langleter, e pwen for sete ler i ti partisip dan en show live lo progranm BBC ‘Shepherd bash Studio’.
I’n osi pas sis mwan Istanboul, La Tirki kot in osi performen kot Grandyaruz Hotel. Karyer mizikal Msye Scholastique in osi anmenn li Sengapour, e 2-an Bahrain kot in perform lotel Royal Meridien.
Sa santer in osi perform dan plizyer letablisman touristik Sesel, enkli La Perle Noire, Sunset Beach hotel, Northolme, Plantation Club e lo zil Alphonse konman ‘manager’ pour ‘entertainment’. Son lavi mizisyen in osi fer li frot zepol e devlop en lanmitye avek George Harrison, ansyen manm benn ‘Beatles’, letan i ti zwenn li lo vakans Sesel, pandan enn son bann sware kot Chez Baptista.
Zis detrwa semenn avan son lanmor, David Scholastique ti dan progranm ‘My Retro’ lo televizyon SBC kot i ti koz avek Nigel Henri lo son karyer mizikal, enkli son label ‘Dasco’, ki laform kourt son de non, son parkour lanmizik, kot i dir an grandisan i ti ekout ‘Beatles’ e Tom Jones, e se sa ki’n enspir li pour konpoze e ekrir sanson.
Dernyen group ki i ti annan avan son lanmor ti apel ‘Cosmos Six’, en non ki i eksplike in swazir akoz i vedir en lot non pour liniver.
David ti dir ki son pli gran lakonplisman sete in ekri en kantite sanson ki’n ganny apresye e zwe dan medya e in ganny sans pour aprann lar ekrir sanson avek en lorganizasyon enternasyonal apele ‘The International Writers Association’.
«Ozordi sa lorganizasyon in donn mwan en ‘honorable membership’, e mon satisfe avek sa,» David ti dir dan sa progranm.
Apard lanmizik, David in osi annan son fanmiy, e Seychelles NATION in koz avek trwa parmi son trez zanfan, son premye garson Ronald aze 49-an, Tyron, 40-an e Basil 38-an. Ronald tre emosyonnel i mazin letan i ti ankor zanfan kot son papa ti’n etabli son benn kot lakour e la bann mizisyen ti vin fer repetisyon kot lakaz menm. I rapel apre lekol kot i ti met tou lenstriman pare, fer enn de son lo lenstriman, avan larive son papa.
«I ti tre zantiy anver nou, kontan organiz nou bann parti lanniverser, me selman i ti drwat, i pa ti les nou fer sa ki nou oule, i ti annan disiplin,» Ronald i dir.
Enn sanson prefere son papa i ‘Se lanmour ki enportan’.
Pour Tyron osi, i rapel son papa avek son benn antye dan lakaz, e mizisyen pe repete lo apremidi e sa ti atir dimoun dan vwazinaz, ki fer kot zot lakour ti reste toultan okipe.
«Mwan mon timid, me papa pa’n zanmen timid. I ti en ‘entertainer’, konfidan lo son mikro, si ou regard son bann entervyou, i artikil e koz byen, i ti vreman annan sa konfidans,» Tyron i dir.
I osi rapel son papa kontan lir magazin Times, e ekout nouvel enternasyonal, pour toultan pe aprofondir son lespri.
Pour Basil, menm si zot papa in esey ankouraz zot pour zwe lanmizik zot pa’n pran sa semen. Li ek Tyron in toudmenm manm lakoral Anse Royale pour enpe plis ki 5-an.
«Mon ti kontan regard li ler i pe sante e zwe lanmizik, in montre nou enn de pti poz gitar, konman pour tap enn de lakle, selman personn pa’n neseserman swiv sa semen akoz i ti enpe strikt li sirtou lo kote ledikasyon kot i ti fer sir ou pe fer leson. I ti kontan lir, e donn nou gidans lo bann liv pou lir, si i pa pe fer lanmizik i pe lir enta,» dapre Basil.
Tyron i kontan tou son sanson me son prefere i ‘Si demen nou separe’, akoz son laspe familyal e relasyon. «Toultan i ti dir avek mwan, en zour ou pou konnen ki savedir lavi. La ou pa konpran la. Parey letan i ti pe ganny problenm avek manman, i dir mwan pa pran kote akoz en zour ou pou konnen ki savedir lavi,» Tyron i dir.
Basil i dir David Scholastique ti osi met bokou lanfaz lo standar e elve zot osi dan sa fason. «I ti annan prensip e i ti viv avek prensip e dimoun pa ti kontan li akoz sa bann prensip. I ti toultan dir nou si ou fer keksoz fer pli byen, pa zis akoz ou’n ganny dir fer e mon pou mazin li koumsa,» Basil i dir.
«Mon swete Seselwa i rapel li konman sa zonm ki’n donn nou sa bann bon lanmizik e ki son kontribisyon pa ganny met de kote,» Tyron i dir lo son kote.
Apard son karyer mizikal ki’n met li direkteman dan lendistri tourizm, Msye Scholastique ti osi enplike avek promosyon atraver vin parmi bann premye dimoun pour konmans fer ‘tour guide’ dan pei, kot i ti anmenn touris marse pour dekouver pei, e osi konman en louvraz par kote, vann ekskirsyon pour bann bato Beau Vallon e Port Launay.
David Scholastique ti grandi Cascade e fer son letid dan lekol sa distrik menm avan al kontiny Modern School. Parmi son bann premye karyer avek lanmizik ti zofisye kot Seksyon Trezor, ensi ki ladwann. I annan kat frer ek en ser.
I ti mor le 5 Novanm e son lanterman i fer ozordi kot legliz Cathédrale Immaculée Conception 2er30 apremidi.
Patsy Canaya / SBC Retro / Esther Scholastique
