Ladres Bidze pour 2023 |05 November 2022

Minis Hassan letan i ti pe prezant bidze 2023 devan Lasanble Nasyonal yer bomaten (Portre par Joena Meme)

Saler pou ogmante aparti Avril 2023

• Saler pli ba pour sorti R5,485 pour ariv R7,343  

Apartir le 1er Avril 2023 travayer dan servis piblik pou vwar en logmantasyon 10% an mwayenn dan zot saler e saler pli ba dan gouvernman pour sorti R5,485 pou ariv R7,343.

Sa i form parti bann lazisteman saler ki Minis pour Finans, Planifikasyon Nasyonal ek Komers, Msye Naadir Hassan, in anonse dan son ladres bidze pour 2023 ki in prezant avek Lasanble Nasyonal yer bomaten.

I’n dir ki dan bidze 2023, gouvernman pe propoz R3.44 bilyon pour reminerasyon ek saler dan servis piblik. Sa i reprezant 11.3 poursan nou prodwi domestik brit, konpare avek 3.01 bilyon an 2022.

“Nou lobzektif i reste pour nou mentenir bidze reminerasyon ek saler an mwayen term a 11 poursan prodwi domestik brit. Pour lannen 2023, nou prozeksyon reminerasyon e saler in ogmant par R428.3 milyon, ouswa 14 poursan letan ou konpar ek bidze 2022,” i ti eksplike.

Parey i ti anonse dan diskour bidze 2022, Minis Hassan i dir gouvernman ti pe travay lo en nouvo striktir saler dan servis piblik. Dan premye faz sa legzersis, sa nouvo striktir saler in konsolid sa bann alawenns swivan dan saler de baz;

• 5 poursan ‘supplementation allowance’ ki ti ganny entrodwir an 2019
• ‘Marketable skills allowance’
• ‘Graduate allowance’ ek
• ‘Performance allowance’

‘Inducement’ ek ‘long-service allowance’ pa enkli dan sa konsolidasyon.

Pour ‘inducement allowance’, sa i neseser pour pran an kont bann fakter ki pa ganny kouver anba sistenm evaliasyon travay, par egzanp mankman konpetans dan marse lanplwa ki fer en kalifikasyon pli ‘marketable’ konpare avek en lot.

Minis Hassan in dir ki gouvernman pou osi fer en resers lo marse lanplwa baze lo bann pozisyon ki egziste dan gouvernman konpare avek sekter prive.  

Pour ‘long-service allowance’ i dir zot in pran kont son konpleksite ek lenpak i kapab annan lo striktir saler. Gouvernman in idantifye ki si i konsolid ‘long-service allowance’ dan sa nouvo grid saler, i kapab ariv bann senaryo kot en travayer ki dan en pli ba pozisyon, son saler i kapab pli o ki sa travayer ki dan en pozisyon pli eleve. Alors sa i kapab anmenn plis fristrasyon ant bann travayer.

I dir dan dezyenm eleman sa legzersis, se en ogmantasyon saler dan servis piblik.

“Apre ki nou’n konsolid sa bann ‘allowance’ ansanm, travayer sekter piblik pou osi ganny en ogmantasyon an mwayenn 10 poursan. Dan nou analiz, ogmantasyon pli ba pou R1,000. Avek sa konsolidasyon ek ogmantasyon 10 poursan, saler pli ba dan gouvernman pou sorti R5,485 pour ariv R7,343.

Pour asir klarite, Minis Hassan ti donn de legzanp ki mannyer sa konsolidasyon allowance ek sa ogmantasyon 10 poursan lo saler pou marse.

“En drayver ki konmela pe ganny en saler debaz R6,325 avek en 5 poursan ‘supplementation allowance’ R316.25, ki fer en total R6,641.25 letan ou konsolid son saler, e avek sa ogmantasyon, son nouvo saler debaz pou ariv R7,641.25.

En graduate ki konmela pe ganny en saler de baz R9,887 avek en 5 poursan ‘supplementation allowance’ ki R494.25, en ‘marketable skills allowance’ R1,400, en ‘graduate allowance’ R5,000, ki fer en total R16,781.35, letan ou konsolid son saler avek sa ogmantasyon, son nouvo saler debaz pou ariv R18,662.43,” Minis Hassan ti eksplike.

Minis Hassan ti fer resorti ki trwazyenm eleman sa travay i ki gouvernman in plas sak endividi avek son nouvo saler lo sa nouvo grid saler ki annan selman 12 ‘band’ e ki annan 15 ‘steps’ pour sak ‘band’. I dir sa nouvo grid saler in fini ganny finalize e pou ganny eksplike avek travayer dan bann zour ki pe vini.

“Zis pour fer kler, anba sa revi saler, premyerman nou’n konsolid 4 allowance dan saler de baz, e dezyenmman, nou’n donn en ogmantasyon saler an mwayenn 10 poursan lo sa saler ki’n ganny konsolide. Mon swete sa i kler,” Minis Hassan ti dir.

Minis Hassan ti kontinyen an dizan ki dan sa revi, gouvernman in osi deside pour retir saler bann lapwentman konstitisyonnel avek sa ki pour servis piblik. Saler servis piblik pou ankadre dan en polisi ki Biro Servis Piblik pou administre.

Kant a saler bann Lapwentman Konstitisyonnel, Minis Hassan i dir gouvernman pou apwent en komite endepandan pour revwar zot saler prenan kont tou bann benefis ki bann lapwentman Konstitisyonnel pe gannyen ozordi. Sa legzerzis pou ganny fer dan en fason endepandan, transparan e obzektiv.

“Sa ogmantasyon dan saler servis piblik pou pran lefe le 1er Avril 2023 e pe koutR171.9 milyon roupi an 2023 ki reprezant 0.6 poursan prodwi domestik brit.

An 2023, Biro Servis Piblik ansanm avek bann zofisye resours imen dan gouvernman pou fer en revi lo skim travay ki annan dan servis piblik.

“Nou rekonnet ki sa revi saler pe viz zis travayer sekter piblik. Pour bann travayer sekter prive, mon anvi fer en lapel avek zot anplwayer pour zot osi evalye e analize si zot kapab donn en ogmantasyon zot travayer. Depi 2021, ler pei in reouver, lekonomi Sesel in relanse e aktivite ekonomik pe kontinyelman agrandi, alor mon swete ki zot rekonpans zot travayer anvi sa bon performans lekonomi ki nou pe pas atraver,” Minis Hassan in fer resorti.

Marie-Anne Lepathy