Ners i partisip dan en lanmes spesyal |16 May 2022
Reveran Brian Volcère pe diriz lanmes
En lanmes spesyal pour rann omaz bann ners e priy pour zot pour zot profesyon nob, ti ganny fer yer bomaten kot katedral St Paul.
Sa lanmes ti’n ganny organize par platform Sosyete Sivil (Ceps) an kolaborasyon avek sa legliz dan kad lazournen bann ners ki ti Zedi le 12 Me e Lazournen Enternasyonal Lafanmir ki ti yer menm.
Parmi bann ki ti asiste ti Minis pour Lasante, Peggy Vidot, lezot minis, ners ek lezot zofisye ek travayer lasante, parmi lezot dimoun ki ti vin donn zot sipor.
Dan son omeli, Reveran Brian Volcère ki ti diriz sa lanmes, ti dir ki sa selebrasyon bann ners ansanm avek lafanmir i mars byen ansanm akoz bann ners se zot ki fer sir ki lavi sa zanfan ki ne i ganny byen okipe e mentenir pour ki i kapab al kontiny son lavi dan son fanmir kot i pe ale.
I ti demande ki nou apresye travay ki ners i fer akoz i en louvraz ki pa fasil e ki demann bokou.
Reveran Volcère ti remersye bann ners pour zot vokasyon e travay nob ki zot pe fer pour gard lasante nou fanmir dan en bon leta pour benefis nou pei.
I ti demande ki nou priy pour bann ners ki zot ava kontinyen ganny sa lafors ek kouraz pour donn nou en bon servis.
I ti azoute ki legliz osi pou kontinyen siport bann ners dan zot travay nob ki zot pe fer.
Pandan lanmes ti annan en moman silans pour bann ners ki’n kit nou.
Patrick Joubert
