Dan Lasanble Nasyonal |17 March 2022
Proze pour konstrir en 3enm lane semen dan distrik Pointe Larue pou konmanse byento
Travay pour konstrir en 3enm lane semen Pointe Laruei ekspekte konmanse byento, Minis pour Transpor, Anthony Derjacques, in enform bann manm Lasanble sa semenn.
Minis Derjacques in dir ki pour lannen pase sa proze pa’n kapab demare akoz ti napa larzan dan bidze menm si plan pour son premye faz ti’n deza fini ganny laprouvasyon Lotorite Plan depi 2019.
Minis Derjacques in osi dir ki ziska prezan i ankor an diskisyon avek plizyer propriyeter prive pour ki zot siny bann way leave tandis ki SLTA ek lezot zofisye konsernen dan son minister zot ankor pe kontinyen fer konsiltasyon avek bann diferan lotorite e parti prenan dan sa proze parey SCAA, Seypec, Air Seychelles ek UCPS.
Lo son kote SLTA in resevwar selman 5 milyon roupi dan bidze pour sa lannen me Minis Derjacques i dir kou estimen an 2020 pour realiz sa proze ti 8 milyon roupi me la avek lenflasyon e pri tou komodite ki’n ogmante, sa proze i ekspekte kout ankor plis. I dir ki ansemoman SLTA pe reviz son bidze.
Minis Derjacques ti donn sa bann detay Lasanble letan i ti pe reponn en kestyon manm proporsyonnel LDS dan Lasanble, Rosie Bistoquet.
Premye faz sa proze pou konmans kot ronpwen erport e pou ale ziska kot lizin Amalgamated Tobacco. Me Minis Derjacques in dir ki serten revizyon pe ganny fer akoz i annan serten nouvo lamannman ki pe fer dan sa plan swivan bann diskisyon avek tou bann parti prenan konsernen par sa proze.
“Nou ekspekte anmenn sa nouvo plan amande kot Lotorite Plan osito posib e konman sa bann diskisyon lo way leave i konplete e Lotorite Plan i aprouv sa bann lamannman, avek nou bidze 5 milyon roupi nou pou konmans sa proze,” Minis Derjacques in enform Lasanble.
I’n enform Lasanble ki proze semen lakot was Mahé, pli presizeman Baie Lazare, i osi ekspekte konmanse anmenmtan. Konsernan sa enn proze osi Minis Derjacques i dir in annan bokou diskisyon pour konvenk bann propriyeter later prive konsernen pour siny bann way leave.
Minis Derjacques in fer resorti ki bann way leave ki’n sinyen dan lepase pa an konformite avek lalwa e tousala son minister pe bezwen revwar.
Konsernan proze lagrandisman semen Pointe Larue, Minis Derjacques i dir bann benefis ki i pou anmennen pou konsiderab:
- en rediksyon enportan dan kozesyon trafik sirtou dan direksyon lavil dan bomaten;
- trotwar pou ganny konstrir pour amelyor sekirite bann pyeton;
- en pli bon sistenm drenaz ki ekspekte redwir gravite e lentansite linondasyon dan sa rezyon.
An sa ki konsern bann difikilte e konstrent otour sa proze, Minis Derjacques i dir pour ganny lakor bann propriyeter later prive pour siny way leave i touzour reste en pli gro defi e in lans lapel avek sa bann parti prenan pour ede realiz sa proze ki osi enkli met trotwar pour plis sekirite pyeton.
En bon lakor avek tou bann lakonpannyen – servis litilite piblik, telekominikasyon e Lotorite Plan i osi esansyel pour bon deroulman sa proze, Minis Derjacques in dir.
Finansman pour sa proze pa pou ase e Minister Transpor pou bezwen swa vin devan Lasanble pour en bidze siplemanter oubyen rod son prop finansman pour konplet sa proze.
Lo son kote dirizan zafer gouvernman, Msye Bernard Georges, in fer resorti son dezapwentman lo sa size way leave. I dir i pa posib pour bann endividi met otaz bann proze piblik akoz zot pa oule siny en way leave. I dir ki i annan en lalwa ‘Acquisition of Land in the Public Interest Act’ ki permet gouvernman azir ler i pa ganny permisyon avek propriyeter pour ki dan lentere piblik en proze i kapab ganny fer. I’n demann Minis Derjacques pour revwar sa size pour ki sa lalwa i kapab ganny servi kot i neseser pour permet bann devlopman ki en mazorite dimoun i bezwen pran plas e pa ganny met otaz par en minorite.
Marie-Anne Lepathy