Setyenm Lasanble Nasyonal |26 February 2022

Bann manm i donn zot reaksyon lo Diskour Leta Lanasyon

Swivan Diskour Leta Lanasyon prezante par Prezidan Wavel Ramkalawan Mardi pase, bann manm Lasanble Nasyonal in konmans donn zot larepons ek reaksyon lo sa diskour kot bann diferan mizazour konsernan progre dan bann plan anplas pour relans nou lekonomi ti ganny donnen.

Apard ki sitiasyon aktyel pei, bann diferan plan lo fason pour amelyor lekonomi, e osi sitiasyon lavi dan pei ti bann pwen for sa ladres.

Premye pour donn zot reaksyon lo sa ladres pandan sesyon Lasanble Nasyonal yer ti Lider Lopozisyon Onorab Sebastien Pillay ek Lider Biznes Gouvernman dan Lasanble Nasyonal Onorab Bernard Georges, ki osi manm elekte pour distrik Les Mamelles.

Dan son lentervansyon, Onorab Pillay ti dir ki dan son ladres, Prezidan Ramkalawan pa’n kapab pandan sa plis ki dezerdtan ki in koze dir kote nou ete, e ki in fel pour li konekte avek sa ki Seselwa pe santi.

I’n dir ki sa ladres i en desepsyon akoz anba gouvernman LDS, zis en pti group byen eze ek bann siporter ki pe benefisye

I’n dir ki sa diskour in plito retourn nou an 2020 e prezant nou leskiz, akoz, ki li ek son gouvernman pa kapab fer desann pri lavi, e ki mannyer Seselwa isi pa travay ase dir, e ki li son konklizyon i ki napa problenm dan Sesel.

Lo kestyon pri lavi, Onorab Pillay in dir ki pandan sa 16 mwan, i topik ki pe pli preokip lamazorite Seselwa e ki i pe kontinyelman ogmante.

I’n dir ki bokou fanmir pe lite pour fer de bout zwenn, e ki laprovrete i en realite dan Sesel.

Onorab Pillay in osi azoute ki statistik i montre ki pri manze in mont par pros 14 poursan zis konmansman lannen e lamazorite Seselwa pe santi sa.

«Nou’n vwar legliz antre pour donn manze zanfan lekol, nou’n vwar karitas antre pour donn manze zanfan lekol, nou’n vwar Knights of Malta osi vin donn sipor. Plizyer dimounn pe ankor al kot Red Cross,» i’n azoute.

Onorab Pillay in osi fer resorti ki konman dirizan lopozisyon Prezidan Ramkalawan pa ti mank okenn sans pour koz lo sa 40 poursan laprovrete dan Sesel, e ki i etonnen pour vwar sa mank konpasyon, en nouvo latitid blanm sa enn ki dan bezwen, ki par rapor avek ler i ti pe rod vot in konpletman sanze.

I’n dir ki nou bezwen realize ki koezyon sosyal i depan lo sipor ki leta i bezwen donn son pep dan bann moman difisil, e ki nou tou konman Seselwa, sa ki annan e osi sa ki napa, nou form parti sa gran fanmir Seselwa ki bezwen kontinyen travay pour batir sa pei.

Onorab Pillay ti osi azoute ki nou pa’n ganny okenn statistik lo vre leta nou pep an sa ki konsern laprovrete, okenn lanons lo mekanizm pour adres inegalite ki egziste, okenn konpasyon pour bann ki bezwen en sipor adisyonnel, me lo en lot kote, nou’n ganny tou statistik oubyen leskiz lo akoz gouvernman pa kapab fer desann pri lavi.

Lo kote ogmantasyon saler, Onorab Pillay in dir ki depi ler LDS in vin opouvwar in kontinyen lo son traze koupe, ki enkli koup bonous, koup 13enm mwan saler, e koup tann-servis.

I’n dir ki ler gouvernman in fel pour fer desann pri lavi parey i ti’n promet, i vire e dir i en logmantasyon saler ki nou bezwen, e la in dir ki i annan keksoz ki pa azoute.

«Minis Finans ti dekri United Seychelles konman iresponsab ler nou ti koz lo en logmantasyon saler pour bann travayer ki pe ganny saler pli ba pandan deba lo bidze pour 2022. Minis ti dir nou ki bidze i defisiter, e ki zot pou fer lanaliz lo saler pour donn en logmantasyon 2023. Prezidan li i donn nou lenpresyon ki pou annan en logmantasyon saler sa lannen,» Onorab Pillay ti fer remarke.

I ti osi sit remark fer par Gouverner Labank Santral ki ti dir ki en logmantasyon saler i riske anmenn lenflasyon pli o e ki si pou annan en logmantasyon se bann ki dan saler pli ba ki devret benefisye.

Lo kote servis piblik, Onorab Pillay in dir ki zis apre ki LDS in antre dan lofis, zot in konmans pous dimoun, an pa renouvle kontra bann profesyonnel e fer aret travay bann ki pa siport sa parti.

I’n dir ki promosyon pe ganny donnen ant bann aktivis ek sponsor, tandis ki bann post pe ganny kree pour serten bann aktivis ki pe pran plas bann ki’n ganny fer aret travay.

Sa, in dekrir konman politik dan landrwa travay, e osi azoute ki promosyon pe ganny donnen pa lo merit me plito lo baz politik e bann ki aktivman siport gouvernman pe pas par devan bann ki pli kalifye.

Lo menm size, Onorab Pillay in osi azoute ki bokou bann profesyonnel dan zot bann louvraz pe ganny lord avek aktivis, depi dan militer ziska dan servis piblik, e ki dosye i trennen lo latab minis.

I’n osi dir ki aktyelman i annan en klima lafreyer ek entimidasyon dan pei.

Ler i ti pran laparol, Onorab Georges ti dekrir sa diskour konman enn ki sitan parfe dan son konteni, ki sitan ekselan dan son swa parol, ki sitan enteresan dan fason ki in ganny delivre.

I ti dir ki 500 zour pase, Sesel ti dan en sistenm ki pa ti’n ganny renouvle, ki ti pe mars lo en nivo medyok, kot desizyon enportan pa ti ganny pran, e ki ti’n anmenn depandans par son popilasyon lo sa gouvernman.

I ti eksplike ki ler zot ti antre State House alafen Oktob 2020, se sa ki sa ladministrasyon Wavel Ramkalawan ti rankontre, e se sa ki zot ti bezwen sanze si Sesel ti pour sirviv e si promes manifesto LDS pour retourn Sesel dan en leta normal ti pou reisir.

Anpliskisa, i ti dir, Covid-19 ti’n fer ravaz, lekonomi ti lo son zenou e larzan ti pe ganny distribye zis pour anpes nou noye.

Sa ki ti bezwen ganny fer oplivit posib sete en seri desizyon enportan pour sanz direksyon ki pei ti’n pran e remet li lo bon semen.

Onorab Georges ti dir ki transformasyon se en sanzman pli profon, e etale lo en pli gran letan. « Sanzman i andeor; transformasyon i anndan en dimoun e anndan en sistenm. Sanzman i fasil; transformasyon i difisil, akoz ou bezwen al dan fon e fer li pandan en long letan. I pa ni vit, ni fasil, me i posib, e i inevitab,» Onorab Georges ti azoute.

I ti fer resorti ki pli gran transformasyon ki nou pe war, e ki nou bezwen war dan en pli gran lanpler ankor dan bann mwan ki pe vini, se enn dan sakenn parmi nou, pour ki i repann dan nou sosyete annantye.

Sa i ti dir se sorti dan en ‘mindset’ depandans kot tou desizyon i dan lanmen gouvernman e antre dan enn kot sakenn parmi nou, nou pran sarz nou prop lavi, en nou prop responsabilite. Onorab Georges ti eksplike ki avek restriktirasyon dan Fon Pansyon e alokasyon lakaz ek later, nou pou war sa tre byento.

I ti osi azoute ki transformasyon i bezwen enn kot nou prodwir pour rekolte, e non pa asize epi rekolte, kot nou fer en debrouy pour met en pe larzan dekote pour nou lakaz, olye zis met nou non lo en lalis, e esper en lakle.

Transformasyon in osi dir se kot nou antre dan en lanplwa ouswa konmans en pti biznes olye kal lo URS oubyen servi larzan SBFA pour al Dubai.

Touzour lo size transformasyon, Onorab Georges ti dir ki se ler sakenn parmi nou pou konpran ki ‘welfare’ i la pour ed bann kipa kapab, me pa en lanplwa.

I ti azoute ki i kler, dan parol Prezidan, pour nou bezwen kit medyokrite ek pares deryer nou, aret trenn lipye e antre dan en ‘mindset’ kot nou konsantre lo fer maksimonm pour reisi, pour ganny meyer rezilta dan lekol, pour anmenn plis larzan lakaz, pour ed nou plas travay devlope pour ki nou ava ganny plis ankor, e pour ki pei ava ranmas plis taks e alors, bann servis tel parey ledikasyon, lasante ek lezot ankor ava amelyore.

Onorab Georges ti osi fer remarke ki transformasyon personnel i bezwen ganny akonpannyen par transformasyon striktirel lo tou nivo.

«Se sa ki nou’n vwar sa dernyen 500 zour. Dan keksoz pti konman gran in annan en lot fason fer – depi pa met portre Prezidan dan biro gouvernman, prezans Prezidan ek Spiker kot louvertir ofisyel Lakour Siprenm, dan fason sanze bann minis e o-zofisye gouvernman (sa se bann pti keksoz), dan latransparans dan lekel biznes gouvernman i ganny fer, kot desizyon i ganny pran,» i ti eksplike.

Swivan sa de lider, bann lezot manm ti osi donn zot larepons lo diskour leta lanasyon.

Roland Duval