Terminal enternasyonal ek domestik erport pou agrandi e modernize lannen prosenn |28 December 2015
En sonm 606 milyon roupi i ekspekte ganny depanse ant 2016 ek 2020 pour realiz plizyer proze priyoriter ki Lotorite Laviasyon Sivil pou enplimante.
Minis responsab pour Finans, Komers ek Lekonomi Ble Jean-Paul Adam ti fer sa lanons devan Lasanble Merkredi letan i ti pe pronons diskour bidze pour lannen prosenn.
Minis Adam ti eksplike ki bann proze ki pou konmanse lannen prosenn e ki pou ganny enplimante ant sa peryod ki’n mansyonnen i enkli:
• lekstansyon e amelyorasyon terminal enternasyonal ek domestik pour en valer 103 milyon roupi
• reabilitasyon runway e sa pouatraver en lenvestisman 110.9 milyon roupi
• lezot lenvestisman kle dan lekipman esansyel pour en valer 44.6 milyon roupi
• nouvo sant pour navigasyon aeryen e sa i ekspekte kout 15.5 milyon
“Lenvestisman total pandan sa peryod pou ariv 606 milyon roupi e en parti sa kou pou ganny finanse atraver en pre sorti kot Agence Française de Developpement,” Minis Adam ti eksplike.
An sa ki konsern transpor lo later, Minis Adam i dir gouvernman pe envesti en total 70.7 milyon roupi dan sa domenn lannen prosenn e sa i enkli:
• 7.6 milyon roupi pour en pon ant Ile Perseverance ek Anse Etoile
• 24.9 milyon roupi pour en pon Ile du Port
• 18.5 milyon roupi pour diferan semen dan kominote
• 8 milyon roupi pour drenaz e amelyorasyon dan striktir semen
• 18.1 milyon roupi pour repas koltar e mentenir bann semen.
Pour redevlopman Por Victoria, Minis Adam i dir sa plan pou ganny finalize an 2016 e lotorite konsernen pou osi fer analiz lo lasenn valer dan por pour pli byen definir loportinite pour partisipasyon diferan biznes Seselwa dan bann aktivite e osi pour idantifye posibilitie partenarya piblik prive dan sa proze redevlopman.
Minis Adam i dir posibilite finansman sa proze i an diskisyon avek Labank Lenvestisman Eropeen, EIB.