Memwar lanmizik Seselwa an loner Patrick Prosper |28 October 2010

Sa travay,  ki konpri en kofre CD e osi DVD in ganny fer par Pole Regional des Musiques Actuelles ki baze La Réunion anba direksyon Alain Courbis.

I ti ganny prezante avek Msye Prosper par  konseye lanmizik ek ladans Guilene Tacoun sorti La Réunion pandan wikenn kot Bibliotek Nasyonal.

Sa ti zis avan en spektak lanmizik avek bann lenstriman tradisyonnel kot menm veni par Msye Prosper ek bann zenn ki i’n formen limenm.

Prezantasyon ti ganny fer dan prezans Minis pour Devlopman Sosyal ek Kiltir Bernard Shamlaye e Minis pour Devlopman Kominoter, Spor e Kiltir Vincent Meriton.

Osi prezan ti artis lokal Patrick Victor e artis vedet sorti Maurice Marclaine Antoine.
Sa albonm i konpri 17 sanson ki enkli romans, sega ek moutya e sa DVD i montre bann teknik ki Msye Prosper i servi pour fer son bann lenstriman tradisyonnel.

Pandan seremoni,  Msye Victor ti osi prezant Msye Prosper avek en trofe ki onor bann artis lokal. A son tour, Msye Prosper ti remet kopi son albonm ek DVD avek sa de minis.

Sa ti swiv par en spektak tre ritme par Msye Prosper avek son bann group zenn apele Soley e Reyon Soley. Zot ti ganny akonpannyen par Msye Antoine.

Plizyer lenstriman tradisyonnel ti ganny servi pandan spektak tel parey triyang, tanbour ek gitar akoustik.

Ti osi annan bann lezot group sorti dan larezyon ki konpri L’Indigo sorti La Reunion ki ti partisip dan spektak. Plizyer group ladans ti osi la e group Seselwa Fek Arive ti osi fer zot prezans konte.

Msye Courbis ti dir zot in swazir pour finans sa kofre an loner Msye Prosper akoz napa bokou dimoun ki fer lenstriman mizikal tradisyonnel e osi zwe sa bann lenstriman dan larezyon e menm Sesel.

I ti azoute ki i enportan ki sa kalite lanmizik i ganny promouvwar parmi bann zenn pour ki i pa disparet.