Louvertir ofisyel Festival lazenes 2005-Vin sa senbol lespwar pour bann zanfan ki pe grandi, Minis i demann bann zenn |27 August 2005

Minis Faure ti fer sa lapel Vandredi 26 Out aswar letan i ti pe ofisyelman lans Festival Lazenes 2005 pandan en seremoni ranpli avek kouler ek ritm ki ti deroul dan Palais des Sports.

Tenm anba ki sa festival pe deroule sa lannen i “Wi – Nou Zanfan, Nou Trezor, Nou Lavenir”, anliny avek tenm ki Prezidan James Michel in deklar sa lannen.

Dan son diskour louvertir sa festival Vandredi swar, Minis Faure ti fer rapel lazenes Seselwa ki zot in viv zot lanfans dan en Seychelles ki’n donn zot loportinite pour grandi, pour devlope e pour vin sa zenn ki zot ete ozordi.

I ti demann bann zenn, partou kot zot ete, pour atrap lanmen zot pti frer ek ser e osi bann zanfan otour zot e donn zot bon gidans par zot bonn kondwit e bon konportman dan lavi toulezour.
 
“Enspir zot pti frer ek ser e osi lezot zanfan otour zot dan nesesite pour aprann (osi byen ki) zot responsabilite e devwar ki zot bezwen annan pour zot letid,” Minis Faure ti dir.

“Motiv zot pti frer ek ser e osi lezot zanfan otour zot dan valer lanmour pour Seychelles, dan valer respe pour nou prosen e dan valer latolerans pour diferan lopinyon ek lide,” minis ti azoute.

I ti demann avek lazenes Seselwa pour vin sa senbol lespwar pour tou nou zanfan ki pe grandi.

Letan i ti pe koz lo festival limenm, Minis Faure ti dir ki sa levennman i en moman “eksitan e fantastic” ki tou zenn nou pei i espere. 

“Se en moman pour partaz lanmitye antre zot e osi avek zenn ki sorti dan lezot pei. I moman kot zot panse i avek zenn dan lemonn ki napa menm sans ek menm loportinite parey zot.  Festival Lazenes i en moman kot zot pou manifeste tou zot talan. I en gran moman kot pei an antye i zwenn pour selebre ansanm lafyerte e dinamism Lazenes Seselwa,” Minis Faure ti dir.

I ti reasir bann zenn ki gouvernman, anba direksyon Prezidan Larepiblik, pou kontinyen donn zot tou sipor neseser pour zot devlope avek bi ki sakenn de zot arive konkerir lezot lorizon lavi.

“Pour zot reisir dan lavi i depan bokou lo bann valer ek prensip ki zot annan e koman zot pe viv zot lazenes,” Minis Faure ti dir.

Dan son diskour Minis Faure ti osi annan swe lanmitye pour bann delegasyon etranze sorti La Reunion, La Chine ek Oman ki’n vin partisip dan sa festival.

I ti dir i swete ki sa festival ava ranforsi lyen lanmitye ek solidarite ant bann zenn sa trwa pei.

Nou ekspekte anmenn zot en rapor pli detaye lo deroulman louvertir sa festival dan prosen edisyon nou zournal.