De zonm i ganny rimann an relasyon avek lofans trafik drog |15 June 2021
Lakour Siprenm in yer bomaten rimann de zonm Seselwa pour 14 zour.
Sa de sispe ki reste Pascal Village – en zournalis 27-an e lot aze 35-an ki pa anploye – ti ganny arete par bann zofisye sorti dan Dog Unit e Biro Anti-Narkotik (ANB) dan Lafors Lapolis Sesel, Vandredi swar, le 11 Zen 2021, kot zot lakour an posesyon apepre 440 granm rezin kanabis, en balans nimerik ek R16,599.25. Toulede sispe pe fer fas avek sarz pour lofans trafik en drog kontrole.
Antretan ANB in pandan mwan Me 2021 fouy lo 1595 dimoun, fouy dan 113 lakaz, dan 106 transpor e lo 8 bato. Sa bann lafouy in fer ki en total 88 sispe in ganny arete lo Mahé, Praslin ek La Digue an relasyon avek 87 ka ki ANB in anrezistre pour bann lofans ki relye avek en drog kontrole.
ANB in osi formelman kosyonn 55 sispe pour posesyon en drog kontrole.
An rezilta sa bann lafouy ek arestasyon, ANB in arive sezi 43 plan kanabis, 3.94 kilogranm zerbaz kanabis, 1.35 kilogranm rezin kanabis, 930.48 granm eroin e 7.91 granm kokain ki ti dan posesyon bann sispe.
Kominike sorti kot ANB