Ladres Prezidan Danny Faure lo Leta Lanasyon |21 February 2020

Prezidan Faure in anons plizyer mezir pour ede soulaz sitiasyon lakaz dan pei

Lòn lakaz pou ogmante apartir mwan prosen

Apartir mwan prosen, lòn lakaz ki HFC i ofer ki ozordi i 850,000 roupi pou ganny ogmante pour ariv 1.2 milyon roupi e bann lezot lòn pour osi vwar en logmantasyon.

En dezyenm lòn ki ozordi i 400,000 roupi pou ogmante pour ariv 550,000 roupi.

Lòn pour renovasyon mazer lo bann lakaz ki aze plis ki 15-an pou ogmante sorti 250,000 roupi ozordi pour ariv 350,000 roupi.

Pour zabitan Ile Persévérance, lòn pour amelyor zot lakaz ‘Home Improvement Loan – HIL’, pou double sorti 25,000 roupi ozordi pour ariv 50,000 roupi.

En nouvo progranm pou osi ganny entrodwir an Avril sa lannen pour permet zanfan konstrir par lao lakaz zot paran dan bann ka kot paran napa ase later.

Sete Prezidan Danny Faure ki ti anons tou sa bann mezir dan son ladres lo Leta Lanasyon devan Lasanble Nasyonal yer apremidi.

«Sekter prive pe osi ede dan sitiasyon lozman atraver lakaz ki zot lwe avek fanmir. Depi Zanvye sa lannen, taks lo lwe lakaz in redwir pour sorti 15% pour vin 3%. Mon demann propriyeter ki pe lwe lakaz ozordi pour pas sa rediksyon avek zot kliyan,» Prezidan Faure in dir.

I’n fer resorti ki tou sa bann mezir i annan pour bi kontinyen amelyor sitiasyon lakaz pour tou dimoun akoz in dir ki «sitiasyon lakaz dan pei i reste kritik e malgre ki nou’n fer bokou, i reste en defi.»

An sa ki konsern later, Prezidan Faure in dir ki sa lannen, avek en meyer preparasyon e sipor, plan gouvernman se pour delivre 434 kare later dan 13 distrik.

«Statistik sorti Labank Santral i montre ki valer lòn lakaz ki bann labank in prete in ogmant par 20% an 2019 pour ariv 1.77 bilyon roupi. Sa sif i demontre lenvestisman ki fanmir pe mete dan konstriksyon zot prop lakaz,» Prezidan Faure in dir.

Anplis ki sa in osi dir ki gouvernman in aste 42 apartman avek Fon Pansyon lo Ile Persévérance. Ladan 18 apartman pou lwe avek bann zenn profesyonnel sirtou bann ki sorti Praslin ek La Digue ki travay lo Mahé e ki pe rankontre difikilte pour trouv en lozman. 24 apartman pou vann avek dimoun ki napa later ou lakaz.

Prezidan Faure in osi anonse ki apartir Zen sa lannen, Fon Pansyon pou konmans en nouvo proze 87 lakaz dan distrik Au Cap ki pou benefisye bann ki napa later ou lakaz.

«An 2017, mon ti anons en progranm anbisye pour fer 24 lakaz dan 24 distrik dan 24 mwan. Ziska prezan, anba sa proze nou’n fer alokasyon 234 lakaz. 108 lakaz in fini konplete e pe esper alokasyon e 225 lakaz i dan faz konstriksyon,» Prezidan Faure in eksplike.

I dir ki anplis ki sa proze, gouvernman in osi konstrir e delivre 110 lakaz.

«Sa proze 24-24-24 in permet nou idantifye serten febles dan nou zestyon proze lakaz. Nou leksperyans resan pou permet nou amelyor zestyon bann prosen proze lakaz,» Prezidan Faure in dir.

Antretan Prezidan Faure in osi dir ki swivan travay ki Minister Lafanmir in fer dan distrik, in permet bann lotorite idantifye 624 ka kot lakaz i dan en leta tre kritik e zis lannen pase, gouvernman in rezourd 177 sa bann tel ka e aprezan travay pe fer pour konplet sa 447 ka ki reste.

Prezidan Faure in anonse ki gouvernman pou osi anbark lo en progranm pour konstrir 2,500 lakaz dan sa prosen 4-an ki pou finanse par gouvernman Lenn. Sa i dir i vin an rezilta negosiasyon avek gouvernman Lenn ki’n dakor pour finans sa proze atraver en don 40% e 60% pou ganny finanse atraver en lòn ki pou ganny repeye par gouvernman Sesel.

Prezidan Faure i dir sa 2,500 lakaz pou fer en gran diferans dan sitiasyon lozman dan nou pei.

An sa ki konsern travay renovasyon lo bann housing estate ki tonb anba responsabilite PMC, Prezidan Faure i dir ki an 2018 e 2019, PMC ti pe servi son prop reveni pour kapab finans renovasyon lo sa bann propriyete. Me pour ki PMC i kapab akseler travay renovasyon lo plizyer sa bann housing estate, gouvernman in entervenir e ozordi finansman sa bann travay i posib atraver en porsyon sa bond ki PMC ti lanse mwan pase. Sa bann travay pou enkli konstriksyon nouvo sistenm desarz, reparasyon sa bann flat enkli zot twatir.

Marie-Anne Lepathy