Kominike Lapolis |20 November 2025

Sa de viziter avek bann zofisye ki’n partisip dan loperasyon resers

Koup Britanik ki ti’n perdi dan bwa i ganny retrouve

Sa koup viziter Britanik ki ti’n raporte manke dan santye Anse Capucin, Takamaka in ganny retrouve e zot an bonn sante.

Loperasyon resers par lapolis ti al enpe plis ki 3erd-tan edmi, an vi sitiasyon teren e zistans kot sa bann viziter ti’n ale ki ti andeor santye prensipal. Loperasyon ti ganny lasistans trwa sivilyen ki abitye ed lapolis dan bann lenstans parey. Sa i Christian Lionnet, Malik Labonte ek Alrick Agricole. Departman Lapolis i rekonnet zot zefor ek zot sipor pour asiste dan bann ka dirzans parey.

Sepandan, lapolis i oule ankor enn fwa lans en lapel avek bann viziter ek bann letablisman tourisik pour konsey zot bann kliyan lo bann risk ki egziste ler dimoun i antre dan bann santye tousel san en gid eksperyanse. Bann tel loperasyon resers i demann bokou resours e i kout bokou.