Kominike Lapolis |21 August 2025
En zonm i kondann 2-an prizon pour lofans trafik drog
Dominic, Jason Rose sorti Union Vale, in kondann 2-an Prizon, ki’n ganny sispann pour en peryod 2-an, avek en lanmann 24 mil roupi, devan Lakour Siprenm. Sa i dan en ka trafik en drog kontrole.
Rose ti konmet sa lofans le 18 Septanm 2020, apre ki i ti’n ganny arete an posesyon 369.71 granm rezin kanabis.
******
En zonm i ganny sarze pour kas batiman e vole
Kinsley Valentine, aze 44-an sorti Grand Anse, Praslin, in formelman ganny sarze devan Lakour Mazistra Praslin, pour lofans kas batiman e vole.
Mazistra in larg Valentine lo sa bann kondisyon swivan: I pou bezwen pey en sonm 10 mil roupi pour son laliberte provizwar; prodwir 2 dimoun konman en garanti 5 mil roupi sakenn; e siny liv lakour dan kordgard Grand Anse, Praslin 2 fwa par semenn.
Vi ki sa akize pa’n reisi akord demann Lakour pour pey sa kosyon, in ganny rimann andetansyon Servis Prizon Sesel. Sa akize i osi annan en kosyon 24 mil roupi ki Lakour ti’n donn li ziska Septanm 2025 pour peye, dan en ka separe.
Valentine ti’n komet sa bann lofans le 18 Out 2025, kot en letablisman touristik lo Praslin kot i ti’n kas 5 lasanm, e vol plizyer propriyete personnel bann kliyan, avan ki i ti ganny entersepte e arete par sekirite kot sa letablisman.
******
En zonm i kondannen dan 4 ka vol ek menas an servan vyolans
Daniel Jeanne in kondannen devan Lakour Mazistra, Ile Du Port dan 4 ka vol ek menas an servan vyolans.
Mazistra in enpoz en lanmann 3 mil roupi dan sak ka, ki fer en total 12 mil roupi ki Jeanne pou bezwen peye avan le 15 Novanm 2025. Si i pa peye, i pou deservi en term 4 mwan prizon.