Kominike Lapolis |03 April 2025
Lapolis in konfirmen ki Erine Bamboche aze 13-an sorti Perseverance ki ti ganny raporte manke depi le 13 Mars 2025 in ganny retrouve sen e sof dan rezyon Perseverance yer apremidi.
******
Carlos James Jumay sorti Pointe Larue in kondannen devan Lakour Mazistra Anse Royale dan en ka menas an servan vyolans. Jumay ti komet sa lofans le 22 Out 2022 North East Point kot i ti menas son ansyen konpanny.
Mazistra in kondann Jumay en term 1-an prizon avek en lanmann 6 mil roupi ki i pou bezwen peye avan le 30 Out 2025. Mazistra in ordonnen ki son term prizon i ganny sispann pour en peryod 2-an.
******
Nerrick Youngman in kondannen devan Lakour Mazistra Anse Royale dan en ka okazyonn dimal en endividi. Youngman ti komet sa lofans pandan mwan Zen 2021, kot i ti okazyonn dimal lo en miner par bril li lo en parti son lekor avek en bout sigaret.
Mazistra ki ti pe ekout sa ka in pran plizyer konsiderasyon avan pas santans lo Youngman, anvi dan son pledwari ladefans ti’n refer sorti ki Youngman ti’n aksidantelman okazyonn dimal sa miner, e pa ti son lentansyon, ki in kontinyen mentenir en bon relasyon avek sa zanfan menm apre sa lensidan.
Mazistra ti enpoz en santans 1-an prizon lo li, avek en lanmann 5 mil roupi ki i pou bezwen peye avan le 30 Zilyet 2025. Mazistra in ordonnen ki son santans prizon i ganny sispann pour en peryod 2-an.
******
Randy Herbu sorti Pointe Larue in kondannen devan Lakour Mazistra Anse Royale dan en ka okazyonn dimal en endividi. Herbu ti komet sa lofans le 3 Zen 2020, Anse Aux Pins kot i ti fizikman agres en endividi e koz li dimal.
Mazistra in enpoz en santans 1-an prizon lo Herbu, avek en lanmann 6 mil roupi ki i pou bezwen peye avan le 30 Zilyet 2025. Mazistra in osi ordonnen ki son santans prizon i ganny sispann pour en peryod 2-an.
******
Jean-Françoise Esparon aze 22-an sorti Anse Gaulette, Baie Lazare in formelman ganny sarze devan Lakour Mazistra Ile Du Port dan ka kas batiman e vole, vole, trespas kriminel e andomaz propriyete.
Mazistra ki ti pe ekout sa ka, in larg Esparon lo sa bann kondisyon swivan; kot i pou bezwen prodwir 2 dimoun konman en garanti 10 mil roupi sakenn, siny en ‘bail bond’ 10 mil roupi dan son ka pour asir son prezans devan Lakour letan son bann ka pe pase, siny liv lakour dan kordgard Baie Lazare 2 fwa par semenn, restriksyon lo son mouvman depi 7er diswar ziska 5er bomaten, i pa sipoze ganny sarze avek okenn lofans similer pandan letan ki i pou deor lo laliberte provizwar, e pour pa enterfer avek temwen ek konplenan dan sa ka.
Esparon pa’n reisi akord demann Lakour, ki fer in ganny rimann prizon Montagne Posée ziska le 14 Avril 2025.
******
En zonm 40-an sorti English River in ganny rimann 14 zour andetansyon lapolis konman sispe dan en seri ka vol ki’n arive resaman dan rezyon lavil.
******
Oliver Marengo, aze 30-an sorti Baie Lazare, in formelman ganny sarze devan Lakour Mazistra Anse Royale dan 2 ka – kas lakaz e vole – ki’n resaman arive dan rezyon Baie Lazare.
Lapolis, atraver prosekisyon, ti anmenn en mosyon devan Lakour pour demann Mazistra ki sa akize i kontinyen ganny garde lo rimann ziska dernyen determinasyon dan son ka, anvi ki in kas lord ek kondisyon ki Lakour ti’n deza enpoz lo li dan en ka oparavan. Mazistra ti akord demann prosekisyon e rimann Marengo prizon Montagne Posée.
******
Michel Paul Rose, aze 30-an sorti Union Vale in kondannen devan Lakour Siprenm dan en ka an posesyon en drog kontrole. Rose ti komet sa lofans le 18 Septanm 2023, kot i ti ganny arete an posesyon 33.9 granm rezin kanabis.
Ziz ki ti pe ekout sa ka in kondann Rose 1-an prizon avek en lanmann 6 mil roupi. Me in ordonnen ki son santans prizon i ganny sispann pour en peryod 2-an.
******