Vilaz Kreol i atir en gran lafoul |26 October 2019

Dan kad 34enm Festival Kreol, en gran Vilaz Kreol ranpli avek en varyete manze ek zartifay tradisyonnel in ganny met anplas kot Stad Linite, Roche Caiman.

Sa vilaz ti ofisyelman ouver yer apremidi e en pti pe letan apre ti annan animasyon lanmizik depi 6er diswar osi byen ki bann demonstrasyon par bann group enternasyonal, enkli en latroup ladans Endyen.

Depi boner, plizyer vander ek vandez ti’n fini met zot kyosk e konplet bann preparasyon pour sa gran selebrasyon kiltir e tradisyon kreol. Anvant ti plizyer lobze ek prodwi tel ki lenz ek akseswar osi byen ki bann zouzou pour bann pti viziter.

Manze ek rafresisman tipikman kreol ti osi annan anvant dan en kwen kreol. Bann pla favori bokou Seselwa tel ki plo kreol, bouden, pwason griye lo labrez, ladob e nouga ti anvant osi byen ki bann pti gadyak tel ki salad mang, chips bannann ek lezot gro manze e bann zi ki’n ganny fer avek fri lokal.

Plizyer santer renonmen ti la pour met lanbyans pandan en gran spektak enkli Benn Lanbyans ek Phillip Toussaint.

Bann viziter ti byen apresye bann performans e en bann ti’n menm desann avek zot sez pour fer zot konfortab dan laplenn, pandan ki bann zanfan ti zwe.

Aktivite Festival Kreol i kontinyen ozordi ek demen avek Laserenad, en maryaz tifin ek en fun-day an fanmir.

Aktivite i kontinyen lot semenn e sa festival i ekspekte fini le 31 Oktob.

Bann portre ki akonpanny lartik i montre en pe lanbyans kot sa Vilaz Kreol.