Lafis 38enm edisyon Festival Kreol i devwale |16 September 2023

Nouvo lafis pour Festival Kreol sa lannen ti devwale yer pandan en seremoni kot lotel Berjaya Resort, Praslin.

Tenm swazir sa lannen i ‘Lave dan larivyer’ e sa lafis in konsevwar e prodwi par Urny Mathiot ki zofisye sinyor pour grafis kot Lazans Kreativ Sesel dan Lenstiti Nasyonal pour Kiltir, Leritaz ek Lar. Fotografer pour sa proze i Michel Desnousse.

Sete sekreter zeneral sa lenstiti, David Andre, ki ti devwal sa lafis.

Letan i ti pe donn leksplikasyon pour sa lafis, Msye Mathiot ti dir ki i en loner e lafyerte pour li ankor enn fwa prezant en tel travay pour Festival Kreol, avek led en group profesyonel enkli fotograper e akter, ki i dir ti bon swa akoz zot in kapab demontre sa karakteristik ki i ti pe rode pour sa travay.

Msye Mathiot in osi remersye konsey komite Festival Kreol ki’n ede pour vin avek sa tenm ‘Lave dan larivyer’. Nou ava rapel ki lannen pase lafis ti depikte en group fanmiy kot lakour.

«Sa lannen ansanm avek komite nou’n vin avek sa tenm larivyer, ki en lot fason remarkab dan nou kreolite ki ti touzour vivan. I ti landrwa kot ti annan bokou konversasyon par diferan group laz. E ou kapab mazinen ki mannyer bann levennman koumsa ti gou ».

Tou bann akter pour sa lafis i sorti lo Praslin e zot enkli Birdie Accouche, Nadege Medor, Esther Joubert, Hazel Joubert, Ellah Joubert e Roland Andre, ki pa ti kapab prezan e ganny reprezante par Nadege Joubert. Zot tou zot ti resevwar en kopi sa lafis konman souvenir.

En kopi lafis ti osi prezante avek ladministrater distrik Grand Anse e Baie Ste Anne ensi ki departman tourizm.

Bann portre ki akonpanny lartik i montre enn de moman for sa seremoni.

Konpile par Patsy Canaya

Portre : Kontribye