En viziter Ris in prezimen noye dan lanmer Beau Vallon |12 June 2023
Sa de doker ek Konstab Pouponneau
En zonm 60-an avek nasyonalite Ris in prezimen noye dan lanmer Beau Vallon yer apremidi.
Sa zonm ti’n fek ariv Sesel yer bomaten avek son madanm e ti ekspekte kit pei le 21 Zen 2023.
Sete en zonm ki ti lo lans Beau Vallon a sa letan ki ti apersevwar sa viziter zonm andetres dan lanmer kot i ti retir li dan delo e administre premye swen dirzans sirplas asiste par en zofisye lapolis ek 2 dokter ki travay Sesel me ki ti ‘off duty’ a sa letan.
Lapolis in konmans en lanket dan sa enn ka annatandan rapor rezilta letopsi pour determin lakoz son lanmor.
Departman Lapolis i oule senserman remersye Msye Richard Souris, Konstab Michael Pouponneau ek sa 2 dokter ki travay kot Lopital Sesel pour zot aksyon vreman brav ki zot in fer yer apremidi lo lans Beau Vallon. San tarde zot in sey tou zot mye posib pour administre premye swen dirzans lo sa msye etranze ki ti ganny apersevwar andetres dan delo sale kot plitar i ti ganny sertifye mor.
Bann portre i monte sa de dokter, Konstab Pouponneau ek Msye Souris ki ti administre premye swen dirzans lo sa zonm Ris ki’n perdi son lavi.
Kominike sorti kot departman Lapolis
