Mesaz sef egzekitif Konsey Nasyonal bann Zanfan (NCC) Yasmin Umarji alokazyon lazournen nasyonal pour zanfan   |02 June 2023

Yasmin Umarji

‘Zanfan i kado presye ki nou’n gannyen e ki anmenn benediksyon dan nou lavi’

«Zanfan i kado presye ki nou’n gannyen e ki anmenm benediksyon dan nou lavi. Zanfan i bezwen ganny berse, karese e donn tou lanmour.

«Alokazyon lazournen nasyonal pour zanfan mon oule rapel sirtou bann adilt ki en paran, swa biolozik ou non pour reflekte for lo sa kado presye ki nou’n ganny beni avek.

«Lanfans se en letan linosans, lanmour, lazwa e lanmizman. I en letan kot zanfan i zwe, i aprann, i devlope, i ganny bann bon valer, fer bann zanmi e pli enportan form zot prop karateristik e personalite. Konman bann adilt annou ini e ansanm annou fer en renouvelman pour protez e asir byennet bann zanfan.

«Annou ini, pe enport si ou en paran ou non, ou afilyasyon politik ou relizyon, si ou en travayer piblik ou prive,  si ou annan en rol pour ranforsi lalwa ou non, pe enport si ou en zenn ou en trwazenm-az, proteksyon e byennet zanfan i konsern nou tou!

«Ansanm annou fer en langazman pour met anplas e ranforsi bann mezir e striktir pour prevansyon e osi reazir pli vit e dan en fason pli efikas kan i annan labi, vyolans, bann ka neglizans ek leksplwatasyon zanfan.

«Annou sofgard nou zanfan kont tou sa bann kalite danze ki bokou fwa i ariv dan lakour: en landrwa kot zanfan i sipoze sen e sof.

«Zanfan i reste o sant nou tenm nasyonal ‘mon fanmir, mon leker, ansanm annou les zanfan reste zanfan.’ Ansanm annou reste bann defander drwa tou zanfan dan Sesel. Annou reste bann protekter tou zanfan dan Sesel. Paran les ou leker kontinyen bat pour ou zanfan.  

«Pour tou zanfan dan Sesel, bonn fet! Gard bann bon valer e les sa bann valer tel ki lanmour, konpasyon, tolerans e savwar viv transform zot dan sa bon sitwayen ki nou Sesel i bezwen pour en meyer demen.»