PUC i onor 73 travayer ki’n pran zot retret |28 January 2023
Bann retrete dan en portre souvenir
Korporasyon Litilite Piblik (PUC) ti yer bomaten organiz en seremoni kot Lotel Eden Bleu, lo Zil Eden, pour onor 73 travayer ki’n pran zot retret depi lannen 2020 ziska 2022.
Bi sa seremoni ti pour remersye zot pour zot kontribisyon ki zot in fer dan devlopman ek lepanouisman sa korporasyon pour fer li vin sa ki i ete ozordi. Sa se atraver zot dedikasyon, devosyon, lwayote e letan servis ki zot in donnen.
Sa seremoni ti deroul dan prezans lotorite ek manm bord PUC, parmi lezot envite.
Sete tyermenn sa korporasyon, Leonard Alvis, sef egzekitif Joel Valmont ek depite sef egzekitif Doreen Bradburn ki ti prezant trofe ek sertifika avek sa bann retrete sorti dan bann diferan seksyon, tel ki dan ladministrasyon, delo, elektrisite parmi lezot.
Parmi sa 73 zot, 17 ki ti’n fer 40-an servis ou plis, ti osi ganny rekonpanse pour zot long letan servis.
Dan son ladres, Msye Valmont ti remersye sa bann ansyen travayer pour zot lwayote ek devouman anver sa lakonpannyen, malgre bann difikilte ek defi ki zot in pas atraver.
I ti dir ki zot kontribisyon in ed PUC ariv lo sa nivo ki i ete ozordi.
I ti fer remarke ki menm si travay dan PUC pa zanmen en zafer fasil, kot zot in bezwen sirmont plizyer defi, zot in toudmenm, ansanm avek bann lezot koleg travay, kapab eksperyans bokou moman lazwa, lafyerte ek bann gran santiman akonplisman ki fer zot fyer.
«Napa en pli gran rekonfor pour en retrete ki enn ki’n epanouir dan son landrwa, ki’n grandi e ed son koleg pour grandi, ki’n travay avek komitman, e i zouir dan satisfaksyon avek konnesans ki son zefor pa’n anven, kan i regard transformasyon anver ki in kontribye,» Msye Valmont ti dir.
I ti azoute ki atraver parkour ki sa bann retrete in fer, zot ti en sours lenspirasyon pour bokou ki’n zwenn PUC kot zot in ganny sans pour aprann e ganny gide atraver bann enteraksyon ki’n pran plas.
I ti demann zot pour zouir byen zot retret, byen merite, tou-t-an garden antet ki lekip PUC pou kontinyen batir lo sa fondasyon ki zot in kit deryer, pour kontinyen amelyor servis ki ganny donnen.
«Ozordi, PUC i en model e en lorganizasyon serye gras a zot zefor. Mon salye sa bann kalite e valer nob ki zot in kit deryer avek nou. Nou pran sa konman en zouti dan nou zefor pour anmenn PUC ek nou pei pli devan,» Msye Valmont ti fer resorti.
Georges Finesse, aze 61-an ek Marguerite Reddy aze 60-an, ki toulede zot in fer 43-an servis avek PUC, ti dir ki se devouman, determinasyon ek lanmour pour zot travay ki’n fer zot reste tou sa letan malgre i pa’n fasil. Zot ti dir ki le moman in arive la pour zot pran en repo e pas enpe plis letan kot zot lakour.
«I’n en parkour ki pa’n fasil, me selman mon en dimoun ki ti kontan mon travay. Nou bezwen annan devosyon pour nou travay. Nou pa kapab konman nou ganny en pti problenm nek nou kite nou ale. Nou bezwen annan sa determinasyon si nou anvi ariv kot nou anvi arive,» Madanm Reddy ti dir.
Madanm Reddy ti konmans travay avek PUC a laz 18-an konman en travayer lakes kot apre plizyer promosyon i ti termin son langazman konman en ‘manager’ lakes lannen pase.
Lo son kote, Msye Finesse ti konmans travay dan seksyon delo an 1979 konman en operater, apre ki i ti’n sanz plizyer louvraz. Li osi i ti termin son lanplwa lannen pase konman en ‘supervisor’ sinyor.
«Si ou pa determinen ou pa pou zanmen ariv sa kantite letan e pour ou ganny promosyon fodre ou annan bonn kondwit. Sa i lakle. Mon santi mon ankor ase for, me lemoman in arive pour mwan pas en pe plis letan kot mon lakour e se sa ki mon’n deside fer,» Msye Finesse ti dir.
Sa seremoni ti ganny animen par staff PUC ki ti enterpret serten sanson enkli en poenm, e ti fini avek en dezennen.
PUC ti ganny formen an 1986 e plizyer dan sa bann retrete in temwanny son formasyon.
Teks ek portre par Patrick Joubert
