Defen ekriven Regina Melanie i ganny onore |02 November 2022
Stati Madanm Melanie apre ki i ti’n ganny devwale par son de aryer pti zanfan Ricardo ek Denzel (Portre par Louis Toussaint)
‘I pa zanmen tro tar’
Lafanmiy ekriven renonmen, defen Regina Melanie, in ofer son stati avek Lakademi Kreol Sesel.
Sa ti deroul dan en seremoni kot Mize Nasyonal Lendi apremidi konman parti aktivite Festival Kreol.
Sete de aryer pti zanfan Madanm Melanie – Ricardo ek Denzel – ki ti devwal sa stati, e remet avek direkter egzekitif Lakademi Kreol Sesel, Flora Bendavid, pandan sa aktivite apele ‘I pa zanmen tro tar’.
Sa stati fer par artis Egbert Marday ti parmi dernyen proze garson Madanm Melanie, Joel Melanie, pour onor son manman, ki renonmen parmi bann premye dimoun ki ti konmans laklas alfabetizasyon an 1981, letan i ti entrodwir, e plitar vin enn bann ekriven, poet Seselwa tre popiler e partisip dan plizyer aktivite lo nivo nasyonal pour devlop e promouvwar lalang kreol .
Letan i ti pe adres bann manm fanmiy, zanmi ek koleg son manman pour remet sa skilptir avek lakademi, Msye Melanie, ki ti tre emosyonnel, ti retras parkour remarkab son manman, koni konman ‘Inan’ par son bann pros, ki i dir i grave dan listwar literatir kreol Seselwa.
I dir son manman ti en madanm ki toultan dir ‘I pa zanmen tro tar’ e krwar dan ledikasyon son bann zanfan, ensi ki loportinite pour devlope e aprann.
I dir ki sa madanm in osi ganny sans frot zepol avek bann eksper lalang kreol e pa’n zanmen santi li pti akote zot ou efreye.
Msye Melanie i dir parmi son kontribisyon literer i piblikasyon ‘Bardzour i fer’ an 2002, ‘Remor’ and 2012, e osi maniskri lekspresyon imaze.
Travay Madanm Regina Melanie, ‘Memwar mon zanset’, ti pibliye an 2017 par Lenstiti Kreol e sa liv i koz lo lavi lontan e bann krwayans lenterpretasyon diferan sirkonstans, atraver en koup Dolor ek Sarlin.
I ti osi lir en morso sa liv pour bann envite.
«Inan nou konnen si ou ti ankor avek nou ti pou annan bokou pour ou dir. Nou dir ou mersi pour tou sa ki ou’n donnen. Nou oule profit sa lokazyon pour remersye tou dimoun ki’n kontribye pour realiz sa proze,» Msye Melanie ti dir.
Lo son kote, letan i ti aksepte sa travay lar lo lapar Lakademi Kreol Sesel, Madanm Bendavid ti sitiye sa lenstitisyon, ki ansyen Lenstiti Kreol, dan sa seremoni. Sa depi lansman konkour literer Pri Regina Melanie an 2017 par sa lenstiti sa letan, pour bann zanfan primer, pour fer zot apresye lalang maternel, ensi ki konkour pour bann ansennyan ki ti annan pour bi ankouraz ansennyan pour devlop resours itil dan laprantisaz lalang maternel.
« Bi prensipal sa de konkour ti pour premyerman onor travay ek kontribisyon lengwistik e kiltirel ki Madanm Melanie in fer dan devlopman ek prezervasyon lalang kreol ek kiltir Seselwa. Dezyenmman envit e ankouraz bann zenn Seselwa ki’n kit lekol touzour avek sa lakin zot abilite pour lir ek ekrir, les zot ganny enspire par Madanm Melanie pour retourn lo ban lekol si fodre, dan laklas dan zot distrik respektiv. Sa i ava asir zot devlopman personnel dan son totalite e konman en endividi pour remet sa konfyans dan zot lekor pour al de lavan,» Madanm Bendavid i dir.
I azoute ki pri Regina Melanie ti osi en stratezi pour enplimant manda lakademi kreol avek efikasite.
«Onor Madanm Melanie i en siny rekonnesans lapartenans, ek valorizasyon son zefor, son letan, ek lapartaz ki in aport nou dan sa lemonn lengwistik e kiltirel,» i dir.
Apard renonmen pour swiv laklas alfabetizasyon, Madanm Melanie ti osi donn kour alfabetizasyon dan son distrik Anse Royale. I ti osi en manm lo Lasosyasyon Ekriven Seselwa, ek Komite Lalang Kreol konman serser bann mo kreol, kot i ti travay pros avek Lenstiti Kreol. En lot son travay i enkli en pti liv ‘Lasans ti pour Mirey’, ‘Madanm Mizlen e Konpanni’. Madanm Melanie in osi fer gran kontribisyon anver en diksyoner monoleng kreol ki ekspekte sorti byento.
Regina Melanie ti ne 29 Out 1932, e i ti annan 8 zanfan, parmi 5 garson e trwa fiy. I ti travay konman en labourer lamazorite son lavi e plitar ‘cleaner’. I ti konmans laklas alfabetizasyon an 1981 e aprann Kreol, Angle ek Franse. Enn bann envite kot seremoni Lendi ki ti konsider Madanm Melanie konman son gid, Penda Choppy, ti fer rapel fame fraz Madanm Melanie ‘mon al get en kou anba lili’, letan i ti pe ed zot avek en nouvo mo. Dan son temwannyaz, Madanm Choppy i dir ki i pa pou zanmen oubliy imilite sa madanm tre doue e son lenpakt ki swa lo son lavi profesyonnel e personnel.
Kot seremoni ti osi annan manm klib 3enm-az Anse Royale ki ti fer zot temwannyaz e resit poenm ‘Soufrans’, ekrir par Madanm Melanie.
Sa madanm ti mor le 1er Mars 2016 aze 83-an.
Patsy Canaya
