De koup etranze i eksperyans Maryaz Tifin |31 October 2022
Msye ek Madanm Finsterbusch
De koup etranze ki pe vizit Sesel ti ganny sans selebre zot maryaz dan en fason tipikman Kreol e tradisyonnel, dan stil Tifin, kot Domaine de Val des Pres yer apremidi.
Sa de koup i konpri en Msye Britanik Jason Jarvis ek son madanm Alzeryen Kenza, tandis ki lot koup Alman i konpri Andres Finsterbusch ek son konpanny Kathleen.
Dapre tradisyon, maryaz ti konmans avek en laprosesyon kot sa de koup ti ganny swiv par bann envite, avan ki zot ti pran zot plas dan lasal kot restoran Pomme Canelle, kot selebrasyon ti deroule.
Msye ek Madanm Jarvis ti ofisyelman marye dan en pti seremoni lo en lans Sanmdi, dan prezans manman Madanm Jarvis ki’n vwayaz ansanm avek zot.
“I en leksperyans vreman inoubliyab e memorab. Nou pe sitan apresye. Nou santi nou tre sanse ki nou’n ganny swazir konman enn sa bann koup ki Mahé e annefe, Sesel, pe selebre. I en leksperyans sitan spesyal,” Madanm Jarvis ti note.
Sa koup ti zwenn 7-an pase dan Repiblik Kongo kot toulede ti pe travay a sa moman. Pandan sa 7-an zot in vwayaz lemonn ansanm, e sa i reprezant zot premye vizit Sesel, menm si zot annan plan retournen.
“Nou pa ti pou kapab demann plis ki sa. Letan in parfe, e tou keksoz in deroul sitan byen. I vreman spesyal e malgre ki nou pa ti konnen kwa vreman ki pour ekspekte, lorganizasyon e tou in sirpas nou lekspektasyon, e en bon sirpriz,” Msye Jarvis ti azoute.
Prezan pour maryaz ti Minis pour Zafer Etranzer ek Tourizm, Sylvestre Radegonde; Anbasader Sinwan pour Sesel, Guo Wei; sekreter zeneral pour Lenstiti Nasyonal pour Kiltir, Leritaz ek Lar, David Andre; sekreter permanan dan sa menm lenstiti Cecile Kalebi; parmi bann lezot zofisye dan departman Tourizm ek departman Kiltir.
Osi prezan ti bann viziter sorti Lafrans, Lerop ek lezot parti lemonn.
Parey tradisyon i dikte, ti annan bann ladres par bann dimoun ki ti’n ganny swazir konman paren ek marenn sak koup, e ti osi annan romans avek lakonpannyman en benn ki ti prezan pe zwe bann sanson tradisyonnel.
Bann envite, asize lo bann latab byen dekore avek bann dekor natirel tel ki kapatya, labour koko e bann laranzman fler ti ganny sans enterakte avek sa de koup e swet zot tou sikse dan zot lavi maryaz.
Bann gadyak tipikman kreol, enkli chips manyok, nouga koko, moukat, sanmousa ek lezot pti manzay pa ti manke, akonpannyen par en varyete zi lokal ek punch.
Sekreter Zeneral pour Lenstiti Nasyonal pour Kiltir, Leritaz ek Lar David Andre ti pandan son ladres note ki sa aktivite ekstraordiner i demontre diversite ki karakteriz kiltir Seselwa, osi byen ki kiltir Kreol i sitan akeyant.
I ti osi pran en moman pour aklanm Madanm Jessy Freminot ki ti prezan, e ki’n sa dimoun kle deryer bann maryaz Tifin ki’n selebre dan kad Festival Kreol dan lepase.
Se Madanm Jenita Laporte ki’n deryer sa aktivite sa lannen.
Laura Pillay
Portre par Joena Meme
