Lakademi Kreol Sesel i komemor son 35-an legzistans |27 October 2022

Manmzel Fanchette i resevwar en pi tokenn pour son 35-an servis avek sa lenstitisyon

• Erica Fanchette, serser sinyor pour devlopman langaz, i ganny rekonnet pour son 35-an servis

Lakademi Kreol Sesel, pli koni konman Lenstiti Kreol ki ti ofisyelman ouver son laport an Zanvye 1987, ti yer mark son 35enm lannen legzistans avek louvertir ofisyel en gran Salon Savwar Lengwistik e Kiltirel kot Sant Konferans Enternasyonal anvil.

Sa de zour Salon Savwar Lengwistik e Kiltirel ki pe deroul anba tenm ‘Nou lalang Kreol konman en kado’ pe anmenn ansanm diferan minister, lorganizasyon, lazans oubyen antite gouvernman ek sekter piblik e prive sirtou bann ki ofer diferan servis ek prodwi, anviron en 40enn stol antou enkli bann artizan ek fermye ki’n anmenn zot bann prodwi tel parey gro manze, manzay ek zi fri lokal.

Yer, pour louvertir sa levennman, ti annan bokou zanfan lekol ek etidyan pos-segonder, bann paran, minis, bann zofisye kiltir ek lezot zofisye gouvernman.

Zot ti ganny bokou lenformasyon lo en kantite servis ek prodwi dan sa bann stol e kot stol lasante bokou lenformasyon ek bann tes parey HIV ti pe ganny fer sirplas.

Sete Msye David Andre, sekreter zeneral pour Lenstiti Nasyonal pour Kiltir, Leritaz ek Lar ki ti ofisyelman ouver sa levennman.

Erica Fanchette, serser sinyor pour devlopman langaz kot Lakademi Kreol, ti ganny rekonnet e prezante avek en pti tokenn pour son 35-an servis.

Manmzel Fanchette ti zwenn Lenstiti Kreol sa letan an Fevriye 1987, en mwan apre son louvertir.

Letan i ti retras son parkour avek sa lenstitisyon, Manmzel Fanchette ti tous enpe bann travay enportan ki sa lenstitisyon ki ozordi Lakademi Kreol in fer pour ki lalang Kreol i ganny rekonnet konman nou lalang maternel e enn parmi nou trwa lalang nasyonal e donn li son vre plas dan nou sosyete.

“Mon krwar mon pasyon pour langaz ki’n fer mwan reste dan sa metye pour tou sa letan akoz langaz pa statik, i evolye e ou pa zanmen aret dekouver nouvo keksoz e sa bann nouvo dekouvert i fer nou langaz pli enteresan e pli vivan,” Manmzel Fanchette i dir.

Letan i ti retras bann diferan travay ki in akonpli anba bann diferan direkter sa lenstitisyon, Manmzel Fanchette ti mazin kodifikasyon lortograf Kreol ek son difizyon dan pei anba premye direktris Madanm Marie-Therese Choppy, travay resers e akademik, revwar bann tradisyon parey bal asosye, kwen tapi, bann zwe tradisyonnel anba Msye Leon Radegonde, travay pour promouvwar Lenstiti Kreol lo lasenn enternasyonal anba Madanm Penda Choppy e osi travay ki pe ganny fer aktyelman anba Madanm Flora Bendavid pour anmenn Kreol ver lamas, pour tous tou kous lasosyete e pour pa kit personn deryer parmi en ta lezot travay ankor.

“Mon bann lakonplisman i enkli et parmi bann premye dimoun pour travay lo tradiksyon nou Konstitisyon an Kreol e en lot proze mazer ki mon pe fer i lo diksyonner monoleng ki byento nou pou apros bann faz final. Sa i en travay ki’n al plis ki 12-an, Manmzel Fanchette i dir.

I ti azoute ki i vreman satisfe ki pandan sa 35-an in kapab kontribye pour promouvwar nou lalang maternel e donn li son plas ki i merite.

Lo son kote sef egzekitiv aktyel Lakademi Kreol, Madanm Flora Bendavid ki ti zwenn sa lenstitisyon an 2017, ti fer resorti ki bann travay ki zot fer kot sa lakademi pa fasil.

“Sa latas promouvwar, devlop, prezerv nou lalang Kreol ek kiltir Seselwa pa fasil. Nou vre e pli gran defi sa letan sete pour konvenk nou bann partener servis piblik lo lenportans lalang Kreol Seselwa dan zot lenstitisyon sirtou ler zot ti pe desarz zot responsabilite ek fonksyon. Sa lepok ti annan zis kat lenstitisyon ki ti reponn lapel me ozordi sa tandans in ranverse e i annan en trantenn group sorti pour lamazorite sekter piblik, prive e menm bann endividi ki’n enterese pour ede donn en koudmen dan promosyon, prezervasyon ek devlopman nou lalang ek kiltir Seselwa. Ozordi plis ki zanmen sa determinasyon i la pour kontinyen edik, enform e milit pour ki nou lalang i kontinyen fer sa perse lo tou nivo,” Madanm Bendavid in fer resorti.

I’n eksprim son lapresiasyon ki sa bann group in vin devan piblik pour edik zot e angaz zot atraver en partisipasyon aktiv kot tou bann aktivite lo progranm i annan pour bi retir tou baryer pour permet tou sitwayen epanouir, benefisye e devlop zot lekor e ganny akse avek lenformasyon dan lalang Kreol Seselwa ki zot lalang maternel.

I’n demann sa bann lenstitisyon pour vwar lalang Kreol konman en zouti e valoriz li dan tou lenstans ofisyel.

Msye David Andre lo son kote ler i ti pran laparol avan ofisyelman deklar ouver sa Salon Savwar Lengwistik e Kiltirel ti fer resorti ki sa levennman pe reponn lapel Unesco pour transform lespas laprantisaz ek lansennyman lalang Kreol Seselwa.

“Ozordi nou pe servi lespas Sant konferans Enternasyonal Sesel, ideal pour en metod rapid e efikas pour aprann, servi e ganny akse avek lalang ek kiltir Kreol Seselwa.

Sa aktivite i osi koensid avek de aktivite mazer ki lo kalandriye Lenstiti Kiltir. Premyerman Lakademi Kreol anba direksyon Lenstiti Kiltir pe selebre son 35enm lanniverser, byensir antoure avek son bann partener. Dezyenmman, ki pli bon fason pour selebre 35enm lanniverser dan latmosfer amikal, detant, edikatif e enformatif.”

Msye Andre i dir ki lalang travay oubyen administrativ, ofisyel, parlman ek lalang lazistis i en laliberte pour eksprim nou lekor an kreol. Sa selebrasyon i osi envit bann sekter servis piblik pour revizit zot bann dokiman legal, zot manda ; enterpret zot, depouy zot e enplimant zot avek efikasite san oubliy sa politik enklizyon sosyal, ki demann nou pour pa les personn deryer, rekonnet zot drwa pour lenformasyon ek drwa pour ganny akse avek konteni lenformasyon.

Sa seremoni louvertir ti osi enkli bann diferan pti pyes teat ek sanson par bann zanfan ki ti met lanfaz lo lenportans annan bann dokiman ek formiler dan nou lalang maternel dan bann servis piblik.

Antretan tou bann stol servis ek prodwi i eparpiye dan larantre ek lasal prensipal Sant Konferans Enternasyonal tandis ki stol Lenstiti Kreol limenm kot in egzibit son bann liv ek lezot travay e kot bann trwazyenm-az ti pe egzibit zot travay e kot bann zanfan ti’n groupe pour ekout bann rakontaz zistwar Kreol, sa i trouve anba dan larantre parking.

I la osi kot bann artizan ek fermye ti pe montre e vann zot bann travay ek prodwi.

Piblik i annan ziska ozordi apremidi pour vin vwar e ganny lenformasyon dan sa Salon Savwar Lengwistik e Kiltirel.

Nou seleksyon portre i montre en pe lanbyans kot sa aktivite yer.

Marie-Anne Lepathy

Portre par Louis Toussaint)