Minister Lanplwa ek Zafer Sosyal i donn son lasirans komite COGA |08 October 2022

• COGA i zeneralman satisfe

Komite pour bann Lasirans Gouvernman (COGA) dan Lasanble Nasyonal i dir ki pour le moman i ase satisfe avek bann lasirans ki Minister pour Lanplwa ek Zafer Sosyal in fer depi 2021 ziska la.

Tyermenn COGA, Onorab Sylvanne Lemiel, i dir ki serten zot in kapab onore parsyelman tandiski i annan ki zot pa’n kapab onore.

Minis Patricia Francourt ek son bann zofisye ti pe donn en bilan sa bann lasirans pour vwar kwa ki zot in konplete, oubyen pour donn zistans ki zot in arive ziska la.

Parmi ti en sonm 30 milyon dolar fourni par Labank Mondyal pour reform dan Lazans Proteksyon Sosyal pour amelyor servis ki i ofer ensi ki son sistenm benefis.

Dan son leksplikasyon, sekreter prensipal pour Zafer Sosyal, Linda William Melanie, ti eksplike ki Labank Mondyal pa ankor vers tou sa larzan dan kont gouvernman. Vi ki sa i en progranm ki pou al pandan 4-an, larzan i verse anmezir ki gouvernman i zwenn bann target dan en lespas letan ki le de kote in agree.

Sekreter prensipal William Melanie i dir ki an sa ki konsern 13.5 milyon roupi ki ti sipoze donnen an 2021, en porsyon pour premye target se pour asire ki i annan sa nouvo lenstriman apele ‘ODAS’ ki ti pou ranplas sistenm barthel index (MBI) ki Labank Mondyal ti pe demande i met an mars.

«En milyon ti verse, apre ki nou ti kapab montre levidans ki Minister Lasante ti’n ganny laprouvasyon avek Lorganizasyon Mondyal Lasante pour kapab servi sa lenstriman e ki bann travay pour fer pour met li an aplikasyon».

I dir dezyenm morse larzan ti 8 milyon dolar an rezilta progre ki Lazans Proteksyon Sosyal (ASP) ti fer dan letan Kovid pour ed maximonm dimoun.

Madanm William Melanie i dir sa 9 milyon dolar ti verse an Novanm 2021.

4.5 milyon i larzan ki reste e ladan 1.5 i relye avek travay legal pour fer pour anmenn bann kad legal.

Zot in kapab montre Labank Mondyal ki i annan lamannman avek Lalwa Fon Pansyon, Lalwa Sekirite Sosyal, pour kapab met sa nouvo bord, ki i dir i enn bann target.

“Sa nouvo bord ki olye annan de bord medikal pour fer evalyasyon bann dimoun ki ganny lasistans envalidite anba fon sekirite sosyal avek envalidite anba fon pansyon, alors sa lalwa pe vini pour annan en bord », dapre Mme William Melanie.

I osi dir ki sa pou enkli lazans pour swen kot lakour.

Sekreter prensipal i dir ki komite in kapab fer bokou travay sa lannen pour anmenn sa bann polisi devan konsey minis, e asire ki lalwa i drafte. Dapre li de ou trwa lalwa pe vin devan Lasanble Nasyonal sa lannen.

Tyermen COGA, Onorab Lemiel, i dir i satisfe avek larepons sekreter prensipal lo lafason sa larzan in depanse e bann reform ki pe vini.

Lo kote kart STresktifye ti annan serten defayans ansa ki konsern lakantite dimoun ki ti annan kart e pa servi larzan ki ti lo la.

I eksplike ki an 2019, ti annan 1642 kart STC e depans gouvernman ti 12.9 milyon roupi. Sa ti ariv 84.3 milyon roupi pour met lo kart STC e la ti annan 6660 aplikan.

E avek reform an 2021, sa sonm ti desann 3.4 milyon roupi.

ASP i dir pour le moman i annan selman 18 dimoun ki resevwar kart STC e lamazorite i bann kliyan ki pe swiv tretman pour labi sibstans ou drog.

Lo size ‘Liberation memorial Fund’, madanm Morin ti osi dir ki zot annan 8 ki pe benefisye , me sa kont i tonm direk avek Minister Finans e zot napa detay lo la.

Pour departman lanplwa, COGA i oule lasirans lo platform Labour Market Information System, kot la reprezantan sa departman, Susan Morel, chief policy analyst i dir sa pe enplimante.

Sa sistenm ki lakanite travay anrezistre i konpare avek bann ki anrezistre pour lanplwa, plas travay ki annan, bann ki ganny fer aret travay en sa ki pe fer laplikasyon.

I dir menm si in annan fot teknik, i bann pti problenm ki rezourd vitman, e sistenm i an mars.

Lo size ler travay fleksib dan pei minister ti prezant son rapor avek konsey minis an Zen lannen pase kot la ti annan demann ki annan plis resers. Manmzel Morel i dir swivan konsiltasyon avek ILO, sa lorganizasyon pe ed Sesel pour rod en konsiltan pour sa resers, ki pou fer pandan 4 mwan edmi.

An sa ki konsern lasirans pour konstrir en landrwa pour zenn adolesan, PS William Melanie i dir 16.25 milyon roupi pour sa proze i la me napa later vi ki later Cap Ternay nepli disponib.

Onorab Lemiel i dir ki COGA i konpran ki sa sitiasyon e ki sa pou ale vini pour en pe letan, me minister in agree pour kontinyelman gard zot azour.

« Nou satisfe ki i annan ki parsyelman konplete, e ki zot in onore langazman kot zot kapab. Me vi ki I annan ki kontinyel, nou ava aprezan esper zot lasirans an mezir zot konplete e zot ava enform nou, me an gro COGA i zeneralman satisfe,” Mme Lemiel i terminen.

Patsy Canaya