Dan Lasanble Nasyonal Plan in fini drafte pour devlop lagrikiltir lo Coetivy |26 March 2022

Minis pour Lagrikiltir, Sanzman Klima ek Lanvironnman, Flavien Joubert, in dir ki devlopman lagrikiltir lo bann zil i deza dan plan gouvernman kot diskisyon avek diferan partener in deza konmanse.

I dir i annan plan ki’n fini drafte pour devlop lagrikiltir lo Coetivy e i deza annan bann vizit ki’n ganny fer pour evalye e siport devlopman sa proze.

I dir diskisyon ant bann fermye avek IDC (Lakonpannyen Devlopman Zil) pa ti pe mars tro byen lo konmansman akoz ti annan blokaz pour fer avek bann dezakor lo serten kondisyon ki ti pe ganny aplike parey fason later pou ganny lease, akse lo zil si pour zis par bato IDC ou si lezot bato prive pou annan drwa monte desann lo sa zil, si gouvernman i devret antre pour siport serten gro lenvestisman par egzanp pour en jetty, landing site parmi lezot pwen.

Me Minis Joubert i dir departman lagrikiltir in travay avek sa 2 parti pour asire ki sa linisyativ i kontinyen bouze e aktyelman IDC in soumet son bann kondisyon ki pou aplikab pour bann fermye ki pou enplike dan devlopman sa proze e sa i enkli akse avek later ek delo, transportasyon, bann fasilite ek servis pour siport sa bann devlopman.

Minis i dir sa ki enportan aprezan se pour fer sir zot annan en dokiman ki eksplik byen kler tou bann keksoz ki aplikab pour sa aktivite lo zil pour fer ki nenport ki endividi ki anvi travay anba sa lankadreman i kapab fer li.

I’n fer resorti ki son minister ti ava voudre sa lannen vwar omwen en proze demare lo zil kot dimoun ti ava konmans konpran fason ki keksoz pou ganny fer lo zil.

Minis Joubert ti donn tou sa bann lenformasyon dan Lasanble Nasyonal sa semenn letan i ti pe reponn en kestyon par MNA pour Mont Buxton Gervais Henrie.

Son kestyon orizinal ti konm swivan: “Eski Minis pour Lagrikiltir i kapab dir Lasanble Nasyonal ki zistans plan pour ankouraz bann fermye Seselwa devlop lagrikiltir lo en gran lesel lo bann zil elwannyen in arive ?

“Nou pou byento zwenn avek bann fermye ki’n enterese pour ganny zot reaksyon lo sa bann kondisyon e konstat zot nivo langazman e sirtou pour adres bann pwen kot i ankor annan bann diferans. Me nou ti ava voudre kapab travay avek sa bann fermye e finalman tonb dakor ansanm avek IDC lo tou sa bann kondisyon pour nou kapab bouz devan e konmans devlopman proze lo teren,” Minis Joubert in dir.

Minis Joubert in osi fer resorti ki i annan fermye ki’n konmans diskisyon endividyel avek IDC, en keksoz ki i dir zot osi ankouraze e demann sipor sa lakonpannyen dan sa demars.

I dir dapre lenformasyon i annan plis ki en fermye ki’n apros IDC e ki enterese pour zot demar en proze lagrikiltir lo zil Coetivy.

Minis Joubert in osi koz lo en linisyativ pour angaz bann zenn fermye pour fer zot work placement lo zil pour permet zot pli byen konpran realite e ganny leksperyans travay anba bann kondisyon ki egziste lo zil e pour ki zot pa ava ganny entimide par sa kalite proze e ki zot ava vreman enterese fer en karyer dan sa sekter.

“Deza i annan en group etidyan ki pe fer sa leksperyans lo zil Desroches ki tre ankouraze e ki pe montre bann bon rezilta. Nou plan i ki leksperyans travay lo bann zil i vin en keksoz regilye dan progranm edikasyonnel lenstiti letid lagrikiltir,” Minis Joubert in fer resorti.

I’n osi dir ki IDC lo son kote pe fer nouvo lenvestisman dan prodiksyon legim e osi lavyann e sa i enkli dan fasilite labatwar.

Minis in osi dir ki deza IDC pe vwar demann pour prodiksyon ek prowi ki pe ogmante.

Minis Joubert in fer resorti ki letan IDC i demar son bann lenvestisman sa i ekspekte azout en bon poursantaz lavyann poul e osi pork lo marse lokal.

I dir ki ti ava byen si plitar IDC limenm ti a kapab enterakte avek bann manm Lasanble e donn zot e osi manm piblik plis detay lo son bann plan ek proze.

Marie-Anne Lepathy