Zanfan lekol i demontre zot talan dan lapoezi |21 March 2022
En portre souvenir (Portre par Thomas Meriton)
Apre en semenn lantrennman lo lafason konman pour ekrir poenm, en trantenn zanfan lekol primer Mont Fleuri ti ganny sans demontre sa ki zot ti’n aprann pandan en sesyon poezi dedye a bann madanm ki ti fer Vandredi bomaten kot sa lekol menm.
Sa aktivite poezi, konman parti bann aktivite pour rekonnet rol bann madanm dan lasosyete pandan sa mwan, ti ganny organize par Konsey Nasyonal pour Zanfan (NCC) ek Lasosiasyon Bling Bling.
Ankadreman bann zanfan dan poezi, pandan sa latelye en semenn, ti vin atraver en kolaborasyon ant sa de antite e osi sa lekol. Son bi sete pour ki bann zanfan zot ganny bann teknik ekrir poenm e osi pour fer zot enterese dan sa form lar. I en linisyativ NCC pour donn sans bann zanfan devlop zot limazinasyon ek eskprim zot dan diferan fason atraver lanmour ek lemosyon parmi lezot.
Parmi bann ki ti asiste sa aktivite rekonnesans anver bann madanm e pour donn en sipor nou ban fitir poet, ti sef egzekitif NCC, Yasmin Umarji; direktris Daniela Vidot; reprezantan Lasosiasyon Bling Bling; reprezantan konsey lekol; ansenyan; zanfan, parmi lezot.
Apard ki bann zanfan ki ti lir zot bann poenm ki zot ti’n ekrir zot menm anba diferan tenm, presizeman an kreol ek an Angle, ti Marie Clarisse ek Ruben Lespoir, de manm Lasosiasyon Bling Bling ki ti osi resit sakenn en poenm dan zot koleksyon. Fodre note ki sete msye Lespoir ki ti fasilitater sa bann zanfan dan sa latelye en semenn.
Tou bann zanfan ki ti koze, enkli serten ki ti vwar li enpe difisil pour konmanse, ti dir zot in byen apresye zot semenn ankadreman ki ti vreman enteresan.
“Mon kontan pour vin asiste sa sesyon akoz mon’n anvi konnen kisisa poenm. Mon’n vwar li osi konman en bon keksoz pour ouver mon lespri e osi konman mon pou kapab eksplor lemonn ek bann lezot keksoz,” Susiyan Hussain, 11-an, ti dir. Ti pran li trwa zour pour ekrir son poenm.
“Poenm i gou fer. I fer mon detann enpe sirtou apre en sesyon leson byen entans. Mon’n vwar li pa tro difisil pour fer. Mon krwar mon pou kontinyen ekrir poenm ler mon ganny letan,” Samia Michel, aze 11-an, ti dir.
Lo lapar bann zanfan ek lekol Mont Fleuri primer, Manmzel Marie-May Vital ti dir ki zot lekol i krwar dan devlopman kreativite bann zafan e se pour sa rezon ki zot byen akeir sa linisyativ. I ti fer remarke ki sa ki sa bann zanfan in aprann pou servi zot tou dilon zot lavi.
I ti remersye NCC pour son linisyativ e Bling Bling pour ankadre sa bann zanfan.
Dapre Sharon Meriton-Jean, direkter kominikasyon ek levennman kot NCC, zot abitye fer en tel progranm pour epanouisman bann zanfan dan tou bann lekol.
I ti azoute ki serten sa bann poenm pou ganny pibliye dan en pti liv ki pou enkli lezot poenm sorti kot bann zafan dan bann lezot lekol.
Lo son kote, direktris lekol, madanm Vidot, ti dir ki zot byen akeir bann tel progranm dan lekol ki pou ed zanfan pour pa zis reste ankadre dan bann ‘curriculum’ lekol me ki zot kapab osi epanouir bann lezot aktivite dan diferan dimansyon, andeor ‘curriculum’, tel ki lapoezi, sanson, sport, lagrikilitir, parmi lezot bann aktivite ki pou ed zot grandi dan sa monn ozordi.
Lo lapar NCC, Madanm Umarji ti prezant Msye Lespoir avek en pti kado pour son kontribisyon anver bann zafan. Ti osi annan en pti kado plitar pour bann zanfan ki’n partisipe.
Dapre fasilitater sa sesyon, Msye Lespoir, bann zanfan pa’n rankontre gran difikilte pour aprann me zis ti mank zot enpe konnesans lo bann vokabiler ase ris ler zot pe eskprim zot.
“Ler ou get bann travay ki zot in prodwir i montre ou ki partisipasyon ti vreman bon. Mon tre satisfe akoz i montre ki zanfan zot byen kontan sa bann pti lesanz koumsa ler zot gannyen. Lentere ek lentouzyasm ti la,” Msye Lespoir ti dir.
Patrick Joubert
