Proze resiklaz bann boutey an ver par departman Lanvironnman |03 March 2022

Msye Kinloch (Portre : Louis Toussaint)

Anviron 8.5 milyon boutey in ganny kolekte ziska prezan

Ziska prezan, anviron 8.5 milyon boutey an ver in ganny kolekte atraver proze resiklaz ki ti ganny inisye par departman Lanvironnman le 18 Zanvye 2021.

Sa progranm resiklaz i aplik zis pour bann boutey lakol an ver ki enkli boutey diven, labyer ek diferan kalite spirit, e i aplik pour nenport ki groser boutey.

I annan antou sis sant, oubyen ‘Redeem Centres’ ki’n ganny plase lo Mahé, Praslin ek La Digue pour fer koleksyon sa bann boutey.

Lo Mahé, konsonmater i kapab anmenn zot bann boutey kot stasyon Anse Royale, Providence, St Louis ek Victoria (Lari Laloz).

Dapre direkter pour Zesyon Salte ek Standar, Msye Fredrick Kinloch, ziska prezan zot tre satisfe avek lafason ki sa legzersis pe deroule.

I’n eksplike ki pour kapab soutenir sa legzersis, i annan en levy (taks) R2 ki’n ganny mete lo sak boutey lalkol, avan ki zot antre dan pei, e ladan, R1 i vin pour konsonmater ler zot vin rann sa bann boutey vid e larestan larzan i al pour sa fasilite ek sa bann Redeem Centres.

Msye Kinloch in dir ki sa bann boutey i ganny kolekte, zot ganny anvoye kot en fasilite resiklaz, e laba zot ganny kraze dan en laform parey disab, e son prodwi final i kapab ganny servi dan konstriksyon.

I’n osi azoute ki en porsyon sa larzan i osi al pour Waste Management Trust Fund ki ganny servi pour enplimant bann proze an relasyon avek zesyon salte.

Msye Kinloch in osi enform manm piblik ki i mandatwar pour kontakte bann sant pour met en lapwentman avan ki zot vin ran zot bann boutey .

I’n osi azoute ki bann sopin lakol Seybrew ek Takamaka Bay pa form parti sa progranm resiklaz, an vi ki sa de lakonpannyen zot annan zot prop sistenm resiklaz anplas.

Roland Duval