Delo monte i en lenkonvenyans lo semen Laurier |11 January 2022

Sitiasyon lo semen Laurier yer bomaten swivan gro lapli (Portre par Jude Morel)

Eski fodre en ka fatal i anrezistre lo semen Laurier avan ganny en solisyon dirab pour delo monte?

Sak fwa gro lapli e yer bomaten pa ti en leksepsyon, semen Laurier i inonde. Dan mwens ki 30 minit, sa semen depi an kitan Amusement Centre pour al ver lasose ti inonde. Transpor ti ganny difikilte pour sirkile, pli move pyeton pa ti oze mars dan sa direksyon, e sa enn de ki ti pli vayan, zot ti ganny mouye par lapli ek delo ki bann veikil ti fwet lo zot.

Par kont en drayver pa ti tro sanse akoz son loto ki ti pe fer direksyon lavil ti tonb dan rigol. Sa i akoz sa gran rigol depi kot lasose ziska dan larantre semen pour al kot Indian Ocean Tuna (IOT) ti plen e delo ti’n mont lo semen. Pour fer kondisyon pli grav, vizibilite i ba pandan sa bann letan e sa i fer li difisil pour drayver vwar bor semen.

I annan aprepre 3-an, en rigol ti ganny konstrir atraver parking kot biro zournal Seychelles NATION pour ede retir delo lo semen devan Amusement Centre.

Yer bomaten, delo ti pe koule dan sa rigol pour al dan lanmer, me pa avek en tro gran vites ek lafors. Sa i petet en rezon akoz delo i kontinyen akimile lo sa bout semen pandan letan gro lapli.

Nou espere ki en solisyon i ganny trouve o pli vit posib pour ede degaz lasasen akoz pyeton, transpor ek biznes i ganny afekte letan bann sitiasyon parey i arive.

Zis mazinen konbyen i kout sa drayver pour tir son loto dan sa rigol, repar domaz si i annan, al fer sek anndan dan son transpor e san kont lezot depans.

Lapli i bezwen tonbe, nou bezwen delo pour nou viv, me in ler pour nou pran plis prekosyon e donn latansyon bann landrwa kot nou vwar i annan problenm.

Dikton i dir «i botan pour kannar me nou imen nou pe soufer».

Alors anpes maler arive apre pour nou taye fer sa ki nou ti kapab fer depi lontan.

Gerard Govinden