Deklarasyon par Prezidan Wavel Ramkalawan swivan lanons ki moutya i ganny rekonnet lo lalis patrimwann mondyal pour lemonn atraver UNESCO |17 December 2021
Prezidan Ramkalawan
«Dezorme, moutya i apartenir pour tou pep ek nasyonalite»
«Le 15 Desanm 2021 pou ganny marke dan listwar nou pei Sesel konman en dat tre enportan. Moutya, enn nou leritaz e senbol kiltirel enportan ki atas nou avek nou pase e en sapit tris e malere dan listwar lesklavaz ek limanite in ganny azoute e rekonnet lo lalis patrimwann mondyal pour lemonn atraver UNESCO, parey Vallée de Mai ek Aldabra.
«Sesel pe aprezan partaz son leritaz kiltirel avek plannet antye e i en gran moman lafyerte e lazwa pour tou Seselwa. Dezorme, moutya i apartenir pour tou pep ek nasyonalite, akoz in ganny rekonnet konman en ladans ki annan bokou sinifikasyon kiltirel avek en rezonans global. Moutya i pa zis pour Sesel aprezan, me i pour osi rezonnen dan lespri lezot pep atraver lemonn, spesyalman bann ki’n konn leokri lesklavaz kot nou frer ek ser ti’n perdi zot idantite ek zot dignite.
«Moutya i form parti nou leritaz Afriken. Leko tanbour moutya ek parol eksprimen dan bann sanson meyer lekspresyon nou zanset pour fer tande zot soufrans e martir sa lepok difisil. Ozordi in vin en senbol rasanbleman popiler ki ini nou ansanm konman en pep fyer nou lidantite kiltirel.
«Mon tre onore pour sa lakonplisman, kot moutya i aprezan enn bann leritaz mondyal, e mon oule remersye tou bann dimoun ki’n travay dir pour fer sa arive. Mon espere ki nou a ganny sans dan le fitir partaz lezot laspe nou leritaz kiltirel avek lemonn antye lo sa menm lanpler.
«Annou fer tanbour moutya rezonnen dan tou kwen nou teritwar e Seselwa debout fyer pour nou idantite Kreol.
«Mersi.»
Kominike sorti kot Lofis Prezidan