Lasezon Kreol in ariv ankor |18 October 2021
Zis detrwa zour avan ki Festival Kreol i demare, Lasezon Kreol ti lanse ofisyelman Sanmdi lo lans Beau Vallon atraver en aktivite tre kolore e kiltirel organize par Fondasyon Kiltirel Seselwa an partenarya avek Boat House.
Ti en levennman ki ti atir pa mal dimoun menm si i pa ti’n ganny anonse piblikman. I ti osi ganny transmet an direk lo televizyon ek Youtube.
Plizyer dimoun ti asiste sa seremoni parmi Minis pour Zafer Etranzer ek Tourizm, Sylvestre Radegonde, sekreter prensipal Cecile Kalebi (kiltir) ek Kevin Perrine (gouvernman lokal) e osi serten viziter ek Seselwa ki ti’n vin detann lo lans sa zour.
Se msye John Etienne ki’n met anplas bann lozistik pour sa progranm e i dir nou ki sa progranm ti tourn otour ‘Kiltir dan Tourizm’.
«Ti en nide ki mon ti anvi devlope i annan en pe letan deza kot mon regroup bann dimoun pour nou al ver lavi, la senplisite e lepep. Sanmdi nou’n akey bann peser avek zot rekolt e nou’n selebre nou diferan tradisyon avec koko, kapatya ek sanson tradisyonnel. Tou ti organik. Dimoun ti danse avek peser, esey plis koko, fer en sapo etc. Tou in tonm anplas dan en semenn edmi e dekor ti fer dan 3erdtan. Nou’n travay tre dir pour sa. »
Dapre Msye Jean-Marc Volcy bi sa aktivite se pour donn en sans Seselwa montre nou kiltir pour lendistri tourizm.
«Nou’n sezi loportinite Festival Kreol pour donn nou plis vizibilite. Nou filozofi se pour protez, devlop e promot nou kiltir Seselwa. Rezon nou bezwen fer sa travay la, se parske i pe disparet. Nou bann dimoun pe konmans perdi sa polites, zwa-de-viv ki nou ti annan enkli nou lanmizik. Nou’n vini pour donn en koudmen bann lenstitisyon kiltirel oubyen menm gouvernman /prive pour nou sov nou kiltir.»
Anbasader Kiltirel Msye Patrick Victor i osi azoute ki i enportan pour bann zenn pran larelev e aret adopte kiltir nou prosen.
Parmi bann manm fondater Fondasyon Kiltirel Seselwa i Jean-Marc Volcy, Patrick Victor, John Etienne, Nigel Henrie, Andreix Rosalie, Jenita Laporte, Benjamin Vel, Peter Derjacques e Michel Savy.
Lansman ofisyel sa fondasyon pour fer plitar.
Nou propoz zot serten moman for sa aktivite atraver sa seri portre.
Vidya Gappy
Portre par Jude Morel
