Poenm - Ed mwan konpran |15 October 2020
Zonm pe kondann zot prop lekor
Pe fer zot vin en viris lo sa plannet later
Paryaz zarm ek vorasite
Pe fer lemonn ganny anvair
Par legoizm ek laenn
Bann viktim tsounami
Mon’n vwar bann kadav
Antere vivan dan disab mouye
San menm en petal fler kondoleans
Mon’n vwar bann lekor dekonpoze
Pe ganny balye dan lav bann volkan
Zonm pe kondann zot prop lekor
Pe fer zot vin zot prop viris
Bann ki posed milyon
In oubliy bann ki napa delo
Bann avek pli gran teknolozi siantifik
Pe reazir parey bann kokiy vid
Plannet later pe esper benediksyon GRAN MET
Mon’n temwanny bann leker sagrinen
Ki’n fer plere
Bann zanfan inosan
Bann manman tousel
Lemonn pe vin modi
Bann lespri satanik
Pe ganny laviktwar lo spirityalite
Bokou endividi
Pe montre zot kote lanver
Bann ki krwar zot pli meyer
Pa menm vo pouvwar bann lisifer
Rasizm pe aparet
Dan plizyer dimansyon
Bann lesklav i ankor pe barbote
Dan disan kolonyal
Limanite i swaf
En nouvo fason fer
En nouvo panse Sosyal
En nouvo konverzans lide
Politisyen pe profite
Pour ganny pwen lo zot rival
Limanite i bezwen en remed
Pour ini sa monn divize
Zonm avek lespwar
Pou ranport laviktwar lo en lager
San servi misil
San okenn bonm mitrayet
Zonm avek kouraz
In anbras bann laroul
Dan bann gro tanpet
Ki par ler in trenn zot
E bat zot lekor avek bann gro ros
Ki’n egziste plis ki de milyon lannen
Zonm pou bezwen konpran
Ki pouvwar pour senm lanmour
Pou reste touzour dominan
Lo bann lanbisyon
Lanmour pour pouvwar.
Par Andrea Mounac