Mesaz Nwel par Prezidan Larepiblik Dokter Patrick Herminie |26 December 2025

‘Lafet Nwel i en letan ki rapel nou lape, lespwar e par lao tou, lanmour’

“I avek bokou lazwa ek limilite ki mon adres zot sa mesaz pour sa lafet Nwel. Dan sa letan kot lalimyer pe

iliminen partou lo nou zoli pti zil, mon fanmiy i zwenn ansanm avek mwan pour partaz sa moman spesyal

avek zot tou.

“Lafet Nwel i en letan ki rapel nou lape, lespwar e par lao tou, lanmour. Bann valer ki form la baz nou lavi

konman en pep e konman en nasyon.

“Nwel i plis ki zis en dat lo kalandriye. I en moman kot nou selebre konpasyon, limilite ek lapartaz. I en

letan kot nou pran en poz, get o dela tou nou bann difikilte toulezour, met nou diferans dekote e zwenn

an fanmir. Rasanbleman, lapartaz ek lanmour i vre lespri Nwel. Souvan i pa gro keksoz ki konte, me

keksoz senp; en bon zefor, en bon panse, en zoli zes; ki fer tou diferans.

“Sa sezon i osi en loportinite pour nou ranforsi bann lyen ki ini nou, avek nou fanmiy, nou zanmi, dan nou

kominote e konman en nasyon. Nwel i osi en moman kot nou mazin avek bokou senserite tou bann ki

pa pou kapab pas sa Nwel avek zot fanmiy, bann ki’n perdi en dimoun pros, bann ki lwen avek zot lakour

e bann ki bezwen travay pandan sa letan festivite.

“Annou alors kontinyen enkilke dan nou zanfan bann bon valer, annou favoriz konpasyon ek respe, annou

fer sir ki lanmour i rennyen dan leker sakenn de nou.

“Mon swet zot tou en lafet Nwel beni, ranpli ek lape, lasante ek lazwa, pour zot ek zot fanmiy.

“Ki Bondye i kontinyen beni nou pei, ozordi e pour touzour.

“Zwaye Nwel zot tou.

“We wish you a Merry Christmas!”

Dr Patrick Herminie

Prezidan Larepiblik Sesel