Kat zonm i lo rimann an relasyon avek bann lofans drog kontrole |19 July 2021
Lakour Siprenm in semenn pase rimann kat zonm Seselwa apre ki zot ti pas devan sa menm lakour dan de ka separe ki relye avek bann lofans drog kontrole.
E dan de lezot ka, trwa lezot akize in ganny large lo kosyon avek plizyer kondisyon.
Dan premye ka, trwa sispe ki pe ganny soupsyonnen konmkwa zot konekte avek lenportasyon apepre 100 granm sispekte drog kokain ki ti antre Sesel le 28 Zen 2021 atraver kargo Erport Enternasyonal Sesel, zot tou le trwa zot in ganny rimann pour 14 zour. Parmi sa trwa sispe, i en zofisye ‘custom’ ki travay kot kargo Erport Enternasyonal Sesel e i aze 31-an e i sorti dan distrik Anse Aux Pins. Li i ti ganny rimann le 9 Zilyet 2021 apre ki zofisye Biro Anti-Narkotik (ANB) dan Lafors Lapolis Sesel ti aret li le 8 Zilyet 2021. Sa lot de sispe, de ‘wholesaler’, toulede aze 29-an, enn sorti dan sou distrik Anse à La Mouche, lot sorti Mont Buxton, zot zot ti ganny rimann le 15 Zilyet 2021, apre ki zofisye ANB ti aret zot le 14 Zilyet 2021.
Dan dezyenm ka, le 14 Zilyet 2021, en sispe 27-an ki travay kot stasyon petrol Beau Vallon, li i ti ganny rimann pour 14 zour apre ki zofisye ANB ti aret li kot son lakour le 13 Zilyet 2021, an posesyon apepre 69.11 granm sispekte drog eroin, en balans nimerik e 14,675 roupi ki tousala in ganny sezi konman parti levidans dan sa ka.
Lakour Siprenm in osi le 12 Zilyet 2021, larg avek plizyer kondisyon tre strikt sa de akize ki reste Pascal Village, ki enn i en zournalis 27-an e lot i aze 35-an e i pa anploye. Parmi sa bann kondisyon pour ki zot kapab ganny large i ki zot bezwen pey sakenn en kosyon 50,000 roupi, de dimoun sakenn pour siny en garanti 40,000 roupi pour garanti ki toulede akize i raport devan lakour zour ki zot ganny apele pour vini.
Nou a rapel ki sa de akize ti ganny arete par bann zofisye sorti dan Dog Unit e ANB, dan lannwit Vandredi swar le 11 Zen 2021 e granmaten Sanmdi le 12 Zen 2021 kot zot lakour, an posesyon apepre 440 granm rezin kanabis, en balans nimerik e 16,599.25 roupi.
Apard ki ganny sarze pour bann lofans trafik en drog kontrole, toulede akize in osi ganny sarze pour lofans vann lalkol kot zot lakour san en permi e pour kas lord lasante piblik ki aktyelman anfors kont Covid-19.
E ankor, menm zour, le 12 Zilyet 2021, dan en lot ka, en lot zonm Seselwa in osi egalman ganny large par Lakour Siprenm lo bann kondisyon tre strikt. Sa akize ki ti lo rimann depi le 30 Mars sa lannen avek sarz pour lofans trafik en drog kontrole, in bezwen pey en kosyon 10,000 roupi konman parti bann kondisyon pour li ganny large.
Nou a rapel ki sa akize ki sorti Nageon Estate, Pointe Larue, aze 33-an ki anploye konman en ‘fish technician’, ti ganny arete kot li Lendi le 29 Mars 2021 par zofisye ANB, an posesyon 58.84 granm rezin kanabis e apepre 7.8 granm eroin, 8.89 granm kokain ansanm avek en balans nimerik. Pandan lafouy kot li zofisye ANB ti osi sezi en total 254,125mil roupi
Tou sa bann ka ki’n ganny mansyonnen i reste aktiv devan lakour.
Kominike sorti kot ANB