Trwa zonm i pas ankour an relasyon avek plizyer lofans |27 May 2021
Trwa zonm, sispe dan trwa ka separe, in resaman pas devan lakour apre ki zot ti komet en lofans relye avek en drog kontrole, parmi lezot lofans.
Premye ti en sispe sorti dan distrik Pointe Larue, en zournalye aze 24-an, ki ti ganny sarze e ganny large menm zour le 21 Me 2021, par Lakour Mazistra pour lofans andomaz propriyete (en transpor lapolis, ANB) e koz dimal lo en zofiye lapolis, ANB.
Sa sispe ti komet sa bann lofans le 20 Me 2021 apre ki zofisye lapolis ANB ti’n aret li kot laboutik Krishna Mart dan distrik Riviere an posesyon serten kantite drog rezin kanabis.
En lot sispe, en ‘porter’ 40-an ki reste Cascade, ti ganny rimann pour 10 zour yer, Mardi le 25 Me 2021, devan Lakour Siprenm pour lofans trafik en drog kontrole : (apepre sa bann drog swivan : 840 granm eroin, 980 granm rezin kanabis, 920 granm zerbaz kanabis e 4 pilil Methylenedioxymethamphetamine - MDMA, koni konman ecstasy).
Apard sa bann drog ki ti dan son posesyon letan i ti ganny arete Lendi le 24 Me 2021 par zofisye Lapolis ANB, sa sispe ti osi annan an son posesyon en balans nimerik ek R32,475. I pou repas ankour le 4 Zen 2021.
Yer, le 26 Me 2021, en peser 56-an ki reste Dan Koko, St Louis, in ganny rimann pour 7 zour par Lakour Mazistra pour lofans trafik en drog kontrole (apepre 2.5 kilogranm zerbaz kanabis) e i pou repas devan Lakour le 2 Me 2021. Sa sispe ti ganny arete par zofisye Lapolis ANB Mardi le 25 Me 2021 an posesyon sa kantite drog kot son lakour.
Kominike sorti kot ANB