Jean Marc Volcy i fer sorti trwa nouvo sanson ranpli avek limour |13 March 2021
Jean Marc Volcy, santer e mizisyen Seselwa renonmen pour son bann sanson tre komik e ranpli avek limour Kreol, in fer sorti 3 nouvo sanson ki pe ganny tre byen apresye ziska prezan.
Sa 3 sanson pe ganny zwe lo tou bann radyo e zot osi anvant anliny dan magazen Tropical Sounds.
Letan i ti pe koz lo sa 3 sanson ki’n sorti i annan anviron en mwan e sa apre son dernyen travay avek tit Leokri ki ti sorti an 2016, Jean Marc i dir in anvi dimoun i tir enpe lespri lo sitiasyon ekonomik aktyel e lo Covid-19 e fer zot riy enpe avek bann sanson Kreol e pirman kiltirel.
Jean Marc i dir sa 3 sanson i en avangou son nouvo travay ki si tou keksoz i al byen i pe mazin lanse petet an Oktob kot i pe ekspekte i annan en Festival Kreol sa lannen.
I dir son nouvo travay pou konpri en pe plis ki en douzenn sanson ki i ekspekte fer sorti lo USB.
Me ansaki konsern sa 3 sanson ki aktyelman pe ganny byen apresye, Jean Marc i enterpret selman Gro Boudoum, tandis ki Atrap Lafimen isante par Lauren, en nouvo lavwa lo lasenn mizikal e Si Lanmour i For i enterprete par Judith ki piblik Seselwa i deza konn li tre byen.
Jean Marc i dir ki anfezan sa i pe donn loportinite nouvo talan pour ganny dekouver e osi pour fer zot perse lo lasenn lanmizik e demar zot karyer mizikal.
I’n fer resorti ki Atrap Lafimen i en sanson lanmour avek en move leksperyans e desepsyon me moral deryer se ki apre ki lanmour i fini e ou trouv ou avek en leker brize e dan bokou douler, ou bezwen kantmenm kapab annan kouraz pour releve. Ou pa kapab kontinyen viv dan rev e ekspekte, dan en fason koze Kreol, kapab ‘atrap lafimen’ akoz lanmour in ale parey lafimen me plito ou bezwen kontinyen avek ou lavi.
Si Lanmour i For i osi en lot sanson lanmour ki Jean Marc i dir i pe les bann oditer dekouver pour zot menm.
Pour sa sanson Gro Boudoum i dir i ranpli avek limour e i baze lo bann zistwar malfezan ek sorsye ki granmoun ti rakonte lontan e ‘gro boudoum’ i en term ki granmoun ti asosye avek lerni ki bann zonm ti gannyen e napa nanryen ofansiv pour bann madanm ladan.
Jean Marc in dir avek Seychelles NATION ki fason lanmizik pe ganny vann konmela i pa vwar li pe fer ankor albonm pour met lo CD me in plito fer en seleksyon sanson ki in apel ‘Dou Pike’ e ladan i annan bann tit parey ‘Lanmour Dou Pike’, ‘Sokola Nwanr’, ‘Malis’…
Parey labitid tou son bann sanson i annan bann mesaz tre for ki i dir ‘ler ou pou ekoute ou pou santi ki menm si ou’n ganny pike anmenmtan i annan en douser otour sa pike’.
“Sa i mwan, touzour avek mon bann mesaz ek limour Kreol ki mon pase ler mon tret bann size lavi ki tous dimoun toulezour.”
Jean Marc in ankor enn fwa deplor konman sagrinan bann dimoun ki napa respe pour travay bann artis e travay lar dan Sesel me pe kontinyen partaz travay bann artis zis koumsa.
Me Jean Marc i dir i tre satisfe avek reaksyon ki i pe gannyen ziska prezan.
I dir i sa ki i ti pe ekspekte akoz son bann travay i kiltirel avek bann mesaz ki tous dimoun.
“Mon pa pe rod popilarite me mon pe fer en travay ki annan valer artistik e Kreolite ladan e ki pe promot nivo lanmizik Seselwa ek nou kiltir.”
Me malerezman avek sitiasyon aktyel avek restriksyon Covid bann fàn pa pou kapab vwar en klip video pour sa bann sanson ziska ler ki sitiasyon i anba kontrol e bann restriksyon i asoupli…
Marie-Anne Lepathy
