ANB i fer plizyer larestasyon relye avek posesyon ek trafik drog |16 February 2021

Biro Anti-Narkotik (ANB) dan Lafors Lapolis Sesel in pandan wikenn fer plizyer arestasyon – 6 sispe lo Mahé e 3 lo La Digue – ki relye avek lofans posesyon oubyen trafik drog kontrole. Ansanm avek sa bann arestasyon, 10 lakaz e en transpor ki relye avek sa bann sispe ti ganny fouy ladan. Parmi, Vandredi le 12 Fevriye 2021, en zonm 24-an ki pa enploye e ki ti sipoze dan karantenn (pour Covid-19) kot li Bel Ombre, ti ganny arete pandan en loperasyon Corgate Estate par en sofisye ‘Dog Unit’ dan Lafors Lapolis Sesel. Dan son posesyon ti annan apepre 45 granm sa ki pe ganny sispekte drog kontrole eroin e apre ki lafouy ti ganny fer kot son lakour, R49,940.25 ek en scooter ti ganny sezi. Sa zonm pou ganny prosekite e i pe fer fas avek bann sarz relye avek en drog kontrole e pour kas lord lasante piblik.

Kominike ANB