Zofisye ANB i fer plizyer larestasyon ek lasezi drog |11 February 2021

Biro Anti-Narkotik (ANB) ek Younit Lanket Krim Finansyel (FCIU) dan Lafors Lapolis Sesel in konfirmen ki konman parti lanket ki zot pe fer, en madanm aze 30-an e ki reste Roche Caïman ti ganny enteroze kot Erport Enternasyonal Sesel, Pointe Larue Lendi swar.

En serten sonm larzan ki ti dan son posesyon ti osi ganny sezi anliny avek sa lanket ki an progre.

ANB pe osi raporte ki yer, Merkredi le 10 Fevriye 2021, pandan de parmi son bann loperasyon kontinyel, zot in aret plizyer sispe e sezi plizyer kantite drog.

Dan premye loperasyon kot en lakaz Foret Noire, de madanm aze (parmi en madanm pansyoner), en zonm aze ek en garson miner ti ganny arete apre ki zot ti pe reziste larestasyon, detrir bann levidans ek egzibit an koneksyon avek trafik drog kontrole.

Zot ti osi an posesyon sa ki pe ganny sispekte, apepre sa bann lakantite drog kontrole : 32 granm eroin, 222 granm rezin kanabis (asis), 178.19 granm zerbaz kanabis e 102,000 roupi. En loto avek vit nwanr devan (tinted windows) san lotorizasyon, sispekte ti pe ganny servi dan bann mouvman trafik drog kontrole enkli lezot aktivite kriminel, ti osi ganny sezi.

Pandan en lot loperasyon, safwasi Pointe Larue, en zonm dezabilite (avek en kote lipye) aze 57-an ki pa anploye e ki en sispe trafik drog kontrole, ti pe esey enfliyans bann zofisye ANB avek larzan apre ki i ti pe ganny arete an posesyon sa ki pe ganny sispekte apepre 10 granm kokain, 1 granm zerbaz kanabis e 5,000 roupi.

Tou sa bann sispe pe ganny konsidere pour fer fas avek prosekisyon imedya.

Kominike ANB