En group madanm ek zenn fiy i konplet zot formasyon dan en varyete kour ofer par Waso |26 November 2020

Bann partisipan dan en portre souvenir avek envite apre ki zot ti’n resevwar zot sertifika

Anviron en trantenn madanm ki’n aprann ouswa ki’n devlop e perfeksyonn zot talan ki zot ti deza annan e bann ki’n aprann en nouvo skil dan diferan domenn parey koud, lapatisri, fer fler avek leba e osi laranzman fler atraver bann formasyon donnen par lorganizasyon fanm an aksyon e solidarite (Waso), in termin zot kour e resevwar zot sertifika.

Sa ti dan en pti seremoni ki Waso ti organize semenn pase kot lasal Platform Sosyete Sivil (Ceps) Orion Mall. Ti annan serten sa bann madanm ki pa ti prezan.

Kordinatris sa bann progranm e osi responsab Waso, Madanm Rose-Mary Elizabeth, ti dir letan i ti pe adres sa group madanm ek zenn fiy avan ki zot ti ganny prezante avek zot sertifika ki zot in swiv sa bann kour formasyon ant 1-an a 15 mwan.

“Sa bann konnesans ki zot in gannyen pou permet zot devlop plis e menm konmans en pti biznes. Enn bann lobzektif Waso se pour donn otan konnesans dimoun pour devlop zot talan avek plis lanfaz lo bann madanm,” Madanm Elizabeth ti dir.

Madanm Elizabeth ti fer remarke ki bann madanm ek zenn fiy zot annan bokou potansyel e i nou devwar pour fer sir ki nou devlop sa bann potansyel o maksimonm.

I dir sa group madanm ek zenn fiy in montre lentere depi premye zour ki zot in zwenn sa bann diferan progranm e zot in tre konsistan e disiplinen ziska lafen.

“Sa i montre ki zot ti vreman konnen ki zot anvi e zot in pran zot formasyon tre o serye e sa lannen in osi annan en gran logmantasyon dan demann pour anrezistre pour bann formasyon sirtou dan kour pour patisri e in annan menm serten partisipan ki’n anvoy zot partisipasyon pour lannen prosenn,” Madanm Elizabeth in fer resorti.

Fodre dir ki Waso i ganny sipor finansyel avek gouvernman pour li soutenir son bann progranm ki konplemant zefor nasyonal dan domenn sosyo-ekonomik pour redwir lapovrete sirtou parmi bann madanm.

Lo son kote sef egzekitif Ceps, Michel Pierre, in felisit Waso pour son langazman o kour tou sa bann lannen ki’n pase pour kontinyen donn formasyon bann madanm ek zenn fiy dan plizyer domenn pour asire zot devlop zot talan e vin endepandan e pour menm kapab konmans zot prop pti biznes.

I ti fer remarke ki Waso ti etabli an 2008 avek reform ekonomik e i ankor touzour relevan e angaze dan bann progranm ki i ofer.

I’n asir sa lorganizasyon ki Ceps pou reste angaze pour siport son bann progranm ek lezot linisyativ ki i vin avek pour kontinyen donn skil bann madanm ek zenn fiy.

Jude Fred, tyermenn Ceps, ti osi felisit Waso e sa group madanm ek zenn fiy e demann zot pour met sa ki zot in aprann o servis zot fanmir e osi zot kominote.

I’n osi demann Waso pour met valer azoute lo bann prodwi ki sa bann madanm i fer pour asire ki zot ganny byen apresye lo nivo nasyonal e menm pli lwen.

Lindy Cupidon, en reprezantan Lazans Lantrepriz Sesel (Esa) ki enn bann partener kle avek ki Waso i kolabore kot i konsern bann diferan formasyon ki i ofer, i dir Waso in kontribye enormeman dan formasyon bann madanm e osi ranforsi zot kapasite pour fer zot vin endepandan e tir zot dan lapovrete. Li osi in asir Waso sipor kontinyel Esa.

Letan i ti pran laparol Tahiri Laurencine, ki’n swiv en kour dan patisri, ti remersye Waso ek tou son bann enstrikter pour donn zot sa loportinite pour devlop zot talan e osi aprann bann nouvo skil.

I ti dir ki li ek son bann koleg zot in vreman aprann bokou keksoz e aprezan i kapab fer son dipen limenm, en keksoz ki i dir son bann zanfan zot pli apresye akoz i pli fre ki bann ki aste dan magazen.

“Apard dipen mon’n osi aprann fer burgers, meatballs…e Sesel nou annan bokou pwason ki nou kapab servi pour fer bokou lezot keksoz ankor,” Madanm Laurencine ti dir.

Fodre dir ki bokou parmi sa bann madanm zot dir zot pe konsider lans zot dan en pti biznes.

Marie-Anne Lepathy