Zenn Artis Kreolofonn 2020 |08 October 2020
Ilario Albest, gran venker dan kategori 4 a 7-an
‘Sa nouvo normal dan letan Kovid-19’ atraver lizye bann zenn artis
Konkour lar vizyel anba tit ‘Zenn Artis Kreolofonn’ in pandan plizyer lannen sa platform ki anmenn bann zenn artis depi laz 4-an ziska 21-an ansanm pour demontre zot konnesans ek talan artistik.
I en levennman annyel ki tonm dan kad bann aktivite Festival Kreol, organize par Konsey Nasyonal pour Lar, an kolaborasyon avek komite lorganizasyon sa festival.
Pour sa lannen, avek sitiasyon Kovid-19, sa levennman in ganny organize lo en pli pti lanpler, e menm sa, bann zenn artis in vin avek bann travay de kalite ki ilistre byen tenm pour sa lannen ki ‘Sa nouvo normal dan letan Kovid-19’.
Dapre Msye Pierre Joseph, enn bann manm ziri akote Msye Danny Sopha ek Madanm Joanna Didon, in annan bokou soumisyon dan sak kategori sa lannen e zot in bezwen fer en legzersis pre-seleksyon vizyel, avan ki bann artis ki’n ganny selekte in pas atraver en seri kestyon pour eksplik zot travay dapre zot prop lenspirasyon, me non pa selman lenterpretasyon bann manm ziri.
Parmi bann kriter sa konpetisyon ki divize an kat kategori – 4 a 7-an, 8 a 13-an, 14 a 17-an e 18 a 21-an – se lafason ki tenm in ganny swiv e ekplwate, lenfliyans adilt dan travay zanfan, teknik artistik, e osi leksplikasyon bann artis vizavi zot louvraz.
Dan kategori 4 a 7-an, gran venker ti Ilario Albest sorti Lekol Endepandan, swivi dan dezyenm pozisyon par Anaïs Lucas sorti Lekol Anse Boileau primer.
Trwazyenm plas sa kategori in ranporte par Maria Emilien ki osi sorti Lekol Endepandan.
Dan group 8 a 13-an se Chloé Gamal sorti lekol Au Cap primer ki gran venker par devan Pamela Louis sorti lekol Anse Boileau primer ek Dylan Mathiot sorti lekol La Rosière.
Anais MacGaw sorti Lekol Enternasyonal i gran venker pour kategori 14 a 17-an, swivi par Salomé Abel sorti lekol Anse Boileau segonder ek Johannes Knowles ki sorti Lenstiti pour Lar ek Desen (Siad).
Dan kategori 18 a 21-an, Luigi Adrienne ki reprezant Siad i gran venker, par devan son koleg Selly Payet ki fini dan dezyenm pozisyon.
En lot etidyan Siad, Hellen Ma, ti fini trwazyenm dan sa kategori.
Bann venker sa konpetisyon ti resevwar zot pri yer pandan en seremoni ki ti deroul kot galeri Carrefour des Arts dan prezans sef egzekitif Konsey Nasyonal pou Lar, Msye Jimmy Savy, e lezot zofisye ek travayer sa konsey, ensi ki bann ansennyan ek paran bann zenn artis.
Roland Duval
Portre par Jude Morel
