Eleksyon Zeneral 2020 |29 September 2020
Kandida Prezidansyel i demar zot progranm lo radyo ek televizyon
Par Vidya Gappy/Roland Duval/Marie-Anne Lepathy
Dan kad kanpanny pour Eleksyon Zeneral 2020, sa trwa kandida prezidansyel ki pe debout ti fer zot premye progranm politik lo radyo ek televizyon yer swar.
Premye pour pran laparol ti Alain St Ange, kandida prezidansyel parti One Seychelles, swivi par Wavel Ramkalawan pour Linyon Demokratik Seselwa ek Danny Faure pour parti United Seychelles.
Zot ti annan 26 minit sakenn pour prezant zot progranm.
Dan kad eleksyon pour Lasanble Nasyonal, zot progranm lo radyo ek televizyon pou demare tanto. Sakenn sa kat parti ki’n nomin kandida pour eleksyon Lasanble Nasyonal pou annan 26 minit pour prezant zot premye progranm. Sa kat parti i One Seychelles, Lalyans Seselwa, United Seychelles ek Linyon Demokratik Seselwa.
Demen pou annan en poz dan sa bann progranm e apartir Zedi, se bann kandida pour eleksyon Lasanble Nasyonal, enkli bann kandida endepandan, ki pou adres elektora e sa pou ganny fer par de distrik alafwa.
Nou prezant zot en ekstre progranm dan lord ki sa trwa kandida prezidansyel ti fer yer swar lo televizyon.
Alain St Ange : «One Seychelles pou anmenn sa sanzman reel pour pep Seselwa»
Kandida prezidansyel One Seychelles, Alain St Ange, ti konmans son progranm an dizan ki son parti in devan laport dimoun pour bokou letan.
«Nou’n vwar zot rev ek aspirasyon ganny ‘let down’. Nou pa asize e reve ; dan nou manifesto nou’n fer en kontra avek pep Seselwa ki nou pou delivre avek tou Seselwa. I enportan ki nou bann dirizan pa rat sa sans pour anmenn sa loportinite pour tou Seselwa,» Msye Ste Ange ti dir.
Msye St Ange, ki ti akonpannyen par son kandida vis-prezidansyel Peter Sinon, ti koz lo larive One Seychelles lo lasenn politik ki i ti dir pou ofer en sanzman reel pour bann Seselwa.
«Nou parti politik pe plas sak Seselwa o sant devlopman pei. I annan en kantite malez ki pe frap Sesel kot bann mizerab e dimoun dan bezwen pe ogmante.»
Msye St Ange ek Msye Sinon in osi koz lo kou-d-lavi ki pe kontinyelman ogmante e mank volonte politik pour koriz sa anomali.
«Nou met sa fot lo lebra legzekitif ek lezislatif. Nou pran kont ki 40% nou pep ozordi pe viv dan lapovrete. Lapey bann carer ek bann travayer ki lo kontra i tro ba et zot ganny par anba R7500. Nou pou donn en bouse ler fre nou bann biznesmenn ek nou lekonomi. I annan tro bokou taks e nou bezwen rann nou lanvironnman ekonomik pli agreab.
«Ti annan en sanzman radikal an 1977, annou pa repet menm zafer, » Msye St Ange ti dir.
Msye Sinon ti osi koz lo stati sosyo-ekonomik Sesel. «Nou ti premye pei dan Lafrik pour ganny en stati pei devlope. Nou sekter lapes i la me lekel ki pe profite ? Ton i annan me nou napa bato ton. Nou napa delwil mais nou annan senk tankers. Sa i demontre ki sa nasyon ki la i annan kapasite pour promouvwar sa sekter menm avek valer azoute. Sa i en sekter kot nou bezwen donn loportinite tou Seselwa. One Seychelles pou get ladan tre serye. Covid-19 in tap nou e in agrav nou sitiasyon sosyal. Tourizm ki ti pilye mazer nou lekonomi in ganny bokou afekte ensi ki plizyer biznes e en kantite sou-sekter. En lesey ti’n ganny fer me ziska prezan napa en plan konpreansif pour revwar nou lekonomi. One Seychelles i vwar nesesite pour osi reform nou sistenm ledikasyon an antye.”
Msye St Ange ti termin son progranm avek sa detrwa mo : «Nou termin avek en promes pour legaliz marijuana e garanti ki nou zenes Seselwa pa bezwen ganny anprizonnen akoz zot in fim en sigaret.»
Wavel Ramkalawan : «LDS i annan en devwar moral pour ranport sa eleksyon»
Konpare avek bann lezot kandida ki ti prezant bann promes e stratezi lo ki fason zot pou diriz pei si zot ganny elekte, Wavel Ramkalawan ki pe debout pour Linyon Demokratik Seselwa (LDS) in lans son kanpanny politik avek diferan temwannyaz lo son parkour ek tranzisyon sorti a en senp pret pour vin en politisyen.
Tou ti konmans boner dan bann lannen 90 avek en sermon dan Katedral St Paul kot Reveran Ramkalawan ti santi ki ti son devwar pour debout e denons tou bann lenzistis e koz kont en sistenm ki dapre li ti pe oprim lepep Seselwa, espesyalman bann ki pa ti an faver, e annan en lopinyon diferan avek sa rezim ki ti pe diriz pei anba en sistenm parti inik.
Konman en pret, oubyen en zonm legliz, i ti santi ki ler ti’n arive pour li koz lo bann lenzistis ki ti pe arive dan pei.
Sa ti konsernan disparisyon, lanprizonnman ilegal e osi legzil forse bann sitwayen inosan ki ti senpleman pa an faver lafason ki Sesel ti pe ganny dirize.
Msye Ramkalawan i dir ki lafreyer ti dernyen keksoz lo son lespri, me plito en volonte pour koz pour bann ki zot lavwa ti’n ganny silansye par sa rezim pour tro bokou letan ki ti pli for.
Pour sa eleksyon, Msye Ramkalawan in swazir Ahmed Afif konman son Vis- Prezidan.
Msye Ramkalawan i fer referans son lalit avek lekritir sent kot pep Izrael ti lalit pour son liberasyon.
«Ler mon ti prepar mwan, sa sermon ti ekrir son lekor akoz pep Seselwa ti pe osi pas dan soufrans, akoz mon ti’n ganny sans koz avek plizyer paran ki zot zanfan ti’n disparet, e osi bann dimoun ki ti’n ganny detenir ilegalman, e osi bann dimoun ki ti’n perdi zot plas travay,» in fer resorti.
Sa bann topik ti fer li realize ki letan ti’n arive pour li adres sa bann size pour ki Sesel i pran en nouvo tournir pour le meyer.
Kandida Vis-Prezidan Msye Afif in dir ki son premye lenpresyon lo Msye Ramkalawan sete en zonm ki ti pare pour debout e fer tande son lavwa kont en sistenm ki ti pe opres lepep Seselwa, atraver bate, deportasyon e menm lanmor.
Konman en politisyen, Msye Ramkalawan pa’n swazir larout fasil, me plito en larout tre difisil, akoz se sa larout ki ti pli bon pour nou pep.
Menm si son seve in blan, Msye Ramkalawan pa’n zanmen les tonbe, me in plito kontinyen sa lalit pour plis ki 30-an, senpleman akoz i pa kapab vwar soufrans son pep.
Plizyer dimoun i apel sa lanbisyon, me pour Msye Ramkalawan i senpleman en parti son vokasyon.
Avek zis sa sermon, trazektwar lavi Msye Ramkalawan ti sanze konpletman, e politik ti antre dan son lavi, san ki limenm i ti pe espekte.
«Mon ti napa lentansyon antre dan politik ditou, me mon ti pe senpleman fer mon devwar konman en pret, e ziska ozordi, mon konsider mwan konman en pret an premye, e dezyenmman en politisyen. I zis ki mon mesaz ti’n vin en dife ki ti konsonm lepep Seselwa. Mon annan mwan en sel vokasyon inisyalman, e sa se pour vin en pret. Se atraver sa minister, an dezyenm lye mon’n trouv mwan pe adres sa bann size avek sa mank leadership ki ti annan dan pei, se la ki mon’n trouv mwan pe met lanmen dan lapat e zwe sa rol leadership,» Msye Ramkalawan i azoute.
Msye Ramkalawan pa’n antre dan politik akoz i ti annan en lanbisyon, me senpleman akoz in anvi vin sa lavwa pour koz lo problenm ki dimoun ti pe pas ladan dan en sitiasyon ki ti tre difisil, e in fer sa avek pasyon.
Depi ki in konmans sa travay, i pa’n zanmen sanze lo sa determinasyon, e depi ki in konmans sa travay politik, in touzour swiv menm laliny e konstaman koz lo laliberte, lazistis, ki mannyer nou pei i ganny gouvernen, e osi lo ki kalite lalwa ki pli bon pour nou sosyete, e ki kalite plan ki nou devret annan pour rezourd bann problenm ki nou pe fer fas avek.
Touzour dapre kandida Vis-Prezidan, Msye Afif, en lot levennman kot i mazin Msye Ramkalawan sete an 2006 kot i ti debout kont sa zefor par gouvernman pour anpes okenn radyo ganny en laysenns, e sa zour keksoz ti pran en lot lelan kot i ti ganny bate e son latet kase.
«E pa menm en semenn plitar, Msye Ramkalawan ti’n retourn dan Lasanble Nasyonal e pe travay avek tou son blesir ki i ti’n gannyen, e sa i montre ou ki zanmen in met son lekor premye. Sa i montre ki i en dimoun ki determinen, ki annan en lobzektiv kler. Son sel bi se pour anmenn lazistis dan Sesel. I en dimoun ki annan en kalite for pour kapab diriz politik dan Sesel,» Msye Afif in azoute.
Msye Ramkalawan i dir ki depi sa premye sermon, son rev sete en pep ki kapab rekonsilye, premyerman, dezyenmman se en pep ki kapab viv san okenn diskriminasyon, kot tou dimoun i ganny trete dan menm fason e annan en serten sans egalite dan bann loportinite.
En pei kot lape i rennyen, e kot napa versman disan, e en pei kot son lekonomi i kapab grandi e vin pli for, e osi kot tou dimoun i kapab respekte kanmarad.
«Dan mon dernyen konvansyon, mon ti dir ki LDS i annan en lobligasyon moral pour ranport sa eleksyon, senpleman akoz mon santi ki sa rev i kapab ganny akonpli. Sa i senplemen kot servis piblik dimoun i kapab ganny trete egalman, baze lo merit, kot personn pa ganny pouse dan zot travay, e kot tou dimoun i kapab ganny akse ek bann servis gouvernman,» in azoute.
Sa i enkli lakaz, lasante, ledikasyon, e kot nou kapab donn tretman bann zenn ki ozordi in vin viktim drog, kot nou kapab redonn zot zot zouti travay kot zot kapab fer en kontribisyon, e osi donn lankourazman biznes pour zot kapab epanouir e fer byen.
Kot Sesel i kapab epanouir, non selman lo nivo prosperite moneter, me osi annan en ‘joie de vivre’ kot Seselwa i aret viv dan fristrasyon, e tousala i form parti sa lobligasyon moral.
«Mon krwar ki nou kapab akonplir sa,» in azoute.
Danny Faure : «Annou koste pour Sesel»
Dan son premye progranm politik, kandida prezidansyel parti United Seychelles (US) Msye Danny Faure in met lanfaz lo nesesite pour annan plis linite parmi nou pep e plis langazman e travay dir par tou dimoun pour batir lavenir nou nasyon e sirmont tou bann defi sirtou ekonomik anmennen par pandemi Covid-19.
Msye Faure in dir ki i les li ganny enspire konman prezidan par kouraz, determinasyon e travay dir tou bann zonm ek fanm Seselwa ki leve tou le bomaten pour al debrouye.
I ti fer resorti ki i konsyan ki konman en pti pei Sesel pa pe zis pas atraver en eleksyon me osi en moman tre difisil koze par en pandemi.
«Mon latansyon konman zot prezidan se pour pa ganny distrer par bann tapaz politize pour fer sir ki sakenn de nou i kapab sirviv sa moman difisil ki nou pe pas atraver,» Msye Faure in dir.
I’n dir ki konman en patriyot a sak fwa ki i get nou paviyon, ki i rankontre en manman tousel ou en retrete, en viktim fleo sosyal, en pti antreprener ou menm bann profesyonnel e bann zenn zanfan Seselwa, i konvenki plis ki zanmen ki ansanm konman en nasyon nou kapab travers sa movetan ki devan nou.
«Sa ki nou bezwen se langazman sak Seselwa pour koste e fer sa ki byen pour nou pei,» Msye Faure in dir.
I’n fer resorti ki sa eleksyon pa parey lezot eleksyon ki nou’n fer dan lepase akoz i pe ganny fer dan milye en pandemi ki pe detri lavi ek laspirasyon bokou nou. I dir ki konman sa zonm ki’n asiz dan sez prezidan pandan sa dernyen 4-an, son rol se pa vin devan nou konman en politisyen ki zis viz lo eleksyon me plito konman en dirizan ki konn tre byen ki difikilte ki nou pei pe pas ladan.
«Mon parol i fran e senser akoz pep Seselwa i merit konn vre konsekans nou desizyon ki nou pou fer ansanm pandan sa eleksyon,» Msye Faure in dir.
I’n fer resorti ki 12-an pase nou ti annan sa kouraz pour sirmont difikilte atraver sa reform ekonomik ki nou ti fer e nou ti reisi sirmonte gras a nou langazman politik.
«Fas a sa kriz ki nou ladan ki bokou pli sever, zis mazinen ki kantite zefor e solidarite ki nou pou bezwen pour fer fas avek sa tsounami ekonomik e sosyal ki Covid-19 in met nou ladan. A sa moman ki mon pe koze, nou lekonomi pe depan lo son rezerv pour nou kapab sirviv. Plis ki 5 mil nou bann frer ek ser napa en lanplwa. Zenn ki pe fini lekol pe trakase si zot pou ganny en travay. Biznes pe espere pour konnen si zot pou kontinyen ganny asiste si Covid-19 i persiste. Lensertitid i reel,» Msye Faure in dir.
I’n fer remarke ki li i bezwen adres tou sa bann konsern e met ater en plan konkret pour adres tou sa bann defi e i pour sa rezon akoz nou tou nou bezwen koste pour Sesel.
«Ler mon dir ‘Koste pour Sesel’ mon pe demann ou pour senpleman fer sa langazman konman en sitwayen ki parey mwan i anvi vwar Sesel reisir. Mon pe envit ou pour zwenn mwan ek mon lekip pour form en gouvernman linite nasyonal ki son misyon e vizyon se pour travay pour Sesel e Seselwa e protez tou sa ki nou’n reisi ziska ozordi.»
Msye Faure in dir ki tou dimoun i annan en rol pour zwe pour ede rebatir nou lekonomi e sov Sesel.
Letan i ti fer referans avek klima politik aktyel, Msye Faure ti fer remarke ki bokou pe ganny dir pour esey derout nou lo sa latas nob e enportan ki devan nou me i’n fer kler ki li i napa lentansyon angaz li dan okenn politik saboule ki alafen dizour pa pou adres sa bann problenm reel ki nou pe fer fas avek, me ki plito diviz nou.
«Kalite politik ki mon enterese avek se enn kot nou inifye nou zefor pour retir Sesel dan sa kriz ekonomik ki nou ladan. Mon reste fikse lo sa latas e mon konvenki ki ou osi parey mwan ou anvi le meyer pour Sesel e ou ti ava swete vwar sa arive olye vwar nou divize,» Msye Faure in demann tou Seselwa.
Bokou dimoun in osi zwenn ansanm pour aport zot sipor a Msye Faure e sa i enkli son kandida Vis-Prezidansyel Msye Maurice Loustau-Lalanne ki ti met lanfaz lo vre sitiasyon e realite ekonomik nou pei ; ansyen minis William Herminie ; Jeannette Larue, en zofisye lanvironnman e ansennyan ; Jean Barra, en ansyen siporter lopozisyon, parmi lezot ankor.
