Dan Lasanble Nasyonal |29 July 2020
Minis pour lagrikiltir ek lapes i reponn plizyer kestyon
Minis pour lapes ek lagrikiltir, Msye Charles Bastienne ti dan Lasanble Nasyonal yer bomaten kot i ti reponn kestyon bann manm lo plizyer proze ki tonb anba responsabilite son minister.
Lagrandisman lapas e lezot proze pour peser Glacis
MNA pour Glacis Regina Esparon ti anvi konnen akoz ki ziska prezan proze lagrandisman lapas, ek gear store pour peser Glacis pa ankor demare.
Minis Bastienne in eksplike ki i ti rankontre bann peser Glacis ansanm avek Onorab Esparon le 6 Zilyet lannen pase pour diskit plan devlopman bann fasilite lapes pour sa distrik. I dir ki dan zot analiz zot ti anvi ki Glacis i ganny bann fasilite ki pou permet son bann peser fer zot aktivite dan en lanvironnman pli apropriye. Bann fasilite ti pou enkli en break water, masin ice, gear store e osi en bazar. Plan final pour sa proze ti ganny soumet avek Lotorite Plan le 25 Oktob lannen pase. Pandan sa menm letan Lotorite Lapes Sesel (SFA) ti’n osi fini fer en bathymetric survey pour sa landrwa ki i ti plitar soumet avek Lotorite Plan me malerezman le 4 Fevriye sa lannen Lotorite Plan ti enform SFA ki tou sa bann fasilite saniter asosye avek sa proze pa pou ganny konsidere. Swivan sa, minister ti pran kontakt avek propriyeter later lo lot kote semen kot peser i deza annan serten fasilite. Sa propriyeter ti pare pour negosye e vann serten morso son later. Aktyelman negosyasyon i ankor pe kontinyen e Minister Lapes ek Lagrikiltir pe esper minister responsab pour later pour konsey SFA lo sa lof ki sa propriyeter pe demande.
Minis Bastienne ti dir ki zot pe ekspekte en larepons byento e zot osi ekspekte ki si tou keksoz i mars byen, tou sa bann fasilite ava konstri lo sa morso teren ki an negosyasyon.
Lo son kote, Onorab Esparon letan i ti fer referans a tou bann promes ki i dir Minis Bastienne ti’n fer avek li e kominote peser sa distrik, ti fer resorti ki pli gran dezapwentman i vin atraver mank kominikasyon ant minister, kominote peser e lotorite distrik akoz se selman aprezan ki i konnen ki konstriksyon pa pou demare parey ti’n prevwar e ki i annan negosyasyon ki pe fer avek en propriyeter later lo lot kote semen. I dir ki personn pa’n ganny enformen menm si i ti an kontakt avek SFA konsernan bann diferan difikilte ki sa bann peser ti pe rankontre avek gran mare e koray ki pe andomaz zot bato.
Minis in demann lekskiz pour okenn mank kominikasyon ki’n annan e in asir onorab Esparon ki ti annan kominikasyon atraver lasosyasyon peser kot ti annan peser Glacis prezan. I dir ki sa proze i ekspkete konmanse osito ki SFA i finaliz sa lof pour sa morso later avek sa propriyeter.
Proze liye avek sekter lapes pour kominote peser Anse Royale
MNA pour Anse Royale Sylvanne Lemiel ti anvi konn bann dernyen demars ki SFA ansanm ek Minister Lapes ek Lagrikiltir pe fer pour finaliz bann proze liye avek sekter lapes pour kominote peser Anse Royale.
Minis ti eksplike ki bann proze dan kontinyasyon plan devlopman lapes pour Anse Royale pou enkli en nouvo ice plant ki ekspekte fer sa lannen pour ranplas sa enn ki egziste e en lasose ki pou konstri an 2022. Me anvi gran logmantasyon dan demann pour ice dan rezyon lavil, minister ek SFA in pran desizyon pour enstal sa ice plant ki ti’n ganny dezinyen pour Anse Royale, Providence pour ede amelyor sitiasyon. In dir ki sa ice plant Anse Royale menm si i vye, i ankor pe kapab deservi sa kominote, plan pour ranplas li avek enn nouvo si posib avan lafen sa lannen i ankor la.
An sa ki konsern en nouvo lasose pour Anse Royale, Minis Bastienne in dir ki SFA pe fer en letid fezabilite e i pou retourn kot kominote Anse Royale pour diskisyon avan ki i finaliz en plandaksyon pour sa proze.
Sa proze lasose ki ekspekte konmanse an 2022 a en kou anviron 8 milyon roupi in ganny bidzete provizwarman par SFA anba fon sectoral support finanse par Linyon Eropeen.
Lo son kote MNA Lemiel in demann minis pour konsider plan pour agrandi bazar Anse Royale ki tro pti pour kominote sa distrik par azout en letaz, nesesite pour fourni bann peser sa distrik en landrwa pour met zot bato ater pour netwaye e osi pour enkorpor en slipway dan sa proze lasose.
Ansa ki konsern lagrandisman bazar, Minis Bastienne in dir ki SFA ava eksplor sa posibilite e in osi admet ki pandan en vizit ki limenm in fer kot sa fasilite lannen pase in vwar konstrent lespas pour vann pwason ek legim toulede ansanm e in dir : «mon vwar ki nou bezwen fer keksoz about sa. Nou ava regard ansanm avek Lazans Lagrikiltir (SAA) pour nou kapab dil avek sa.» Konsernan en landrwa pour bann bato ganny anmenn ater pour netwayaz e reparasyon, Minis Bastienne in dir zot pe esper desizyon final avek gouvernman pour ganny en morso later Providence kot reparasyon ava ganny fer pirman pour bann bato artizanal ki ava ede redwir zot kou alavenir konsernan tou sa bann travay ki zot bezwen fer letan zot met zot bato ater.
Sinon, minis in dir ki plan orizinal pour lasose Anse Royale ti annan en konponan ki annan pour fer avek en slipway e sa osi ava ganny konsidere. Me dan limedya, si ti annan en landrwa apropriye dan Anse Royale ki kominote ti kapab ede idantifye, minis i dir i krwar SFA ti pou pare pour antre e ede fer lavi bann peser pli fasil.
MNA Lemiel in dir ki wi i annan en landrwa ki kominote ti’n deza idantifye e in demande ki en vizit i ganny organize avek lotorite konsernen e bann peser.
Kan ki bazar Anse Aux Pin pou konmanse
MNA pour Anse Aux Pins Clifford Andre ti demann Minis Bastienne pour enform Lasanble e kominote peser Anse Aux Pins kan ki travay konstriksyon lo bazar Anse Aux Pins pou komanse.
Minis Bastienne in dir ki travay lo bazar Anse Aux Pins ki pou deservi perser sa distrik e osi Au Cap i sipoze komanse tre byento.
Minis i dir in annan plizyer rankont teknik avek tou bann lotorite konsernen enkli minister, SFA, Lakonpannyen Devlopman 2020, Departman Transpor, SLTA, PUC me sa proze in ganny retar akoz serten konplikasyon lo teren kot i konsern krwaze semen ki pou rantre e sorti Ile Soleil ki pe antrepann par Lakonpannyen Devlopman 2020. Minis i dir sa bann konplikasyon i avek design sa semen an relasyon avek proze devlopman pour peser Anse Aux Pins prensipalman lalinyman semen sorti Ile Soleil pour al ver sid e akse avek bazar e lezot fasilite par traspor ki pe mont ver Anse Aux Pins.
An konsekan in bezwen annan revizyon sa plan semen e a sa pwen Minis Bastienne ti donn detay lo tou sa bann sanzman.
Minis in dir ki si tou keksoz i al dapre plan, travay lo sa nouvo bazar e tou bann lezot fasilite ki’n planifye ansanm, i ekspekte komanse ver Oktob sa lannen e konplete ver Mars lannen prosen.
Minis Bastienne in osi enform Lasanble ki en sonm 10 milyon roupi in bidzete anba sectoral support dan lakor lapes avek Linyon Eropeen pour finans bann tel fasilite ki relye avek lapes.
I ti azoute ki proze bazar e lezot fasilite pour peser i tonb anba responsabilite SFA tandis ki proze konsernan sa krwaze semen pour rantre e sorti Ile Soleil sa pe ganny antreprann par Lakonpannyen 2020 Development.
Minis Bastienne ti osi reponn plizyer lezot kestyon e konsern siplemanter par MNA Andre ki ti enkli tro bokou retar lo sa proze, tro bokou sanzman avek plan orizinal, problenm avek slipway ki pe koz domaz avek bato bann peser parmi plizyer lezot ankor.
Marie-Anne Lepathy