Pour napa devlopman agrikol lo later ki pour sant biodiversite |13 July 2020

Minis responsab pour Lanvironnman, Lenerzi ek Sanzman Klimatik, Msye Wallace Cosgrow in dir dan Lasanble Nayonal semenn pase ki son minister ansanm avek Fondasyon Nasyonal pour bann Zarden Botanik ek lezot lazans e partener pe lager ansanm pour asire ki napa okenn devlopman agrikol lo en bout later ki’n ganny dezinyen pour devlopman biodiversite.

Minis Cosgrow ti pe koz dan Lasanble Nasyonal semenn pase letan i ti pe reponn en kestyon lo sa size par manm elekte pour Grand Anse Mahe, Msye Waven William.

Kestyon orizinal Onorab William ti konm swivan:

Eski minis pour lanvironnman i kapab eksplik sa Lasanble prenan kont gran plan devlopman sant biodiversite ek serten lagreman ki deza egziste avek lezot parti-prenan, lo ki baz ki sa minister i anvi lwe avek en lot endividi en gran bout later dan sant biodiversite Barbarons kot litilizasyon en semen e negosyasyon neseser pa’n ganny fer.

- Akoz ki en tender pa ti ganny mete pour devlop sa morso later avek piblik pour ganny meyer envestiser?

- Akoz malgre ki departman biodiversite in obzekte sa demarkasyon me sa prosesis alokasyon in ganny fer?

- Eski lotorite distrik parey Lalwa Planning i endike, in ganny konsilte lo sa devlopman?

Minis Cosgrow ti dir i krwar sa kestyon ti’n devret ganny adrese avek minister ki responsab pour later vi ki alokasyon later pa tonb dan manda Minister Lanvironnman, Lenerzi ek Sanzman Klimatik. Alor, i ti dir ki posibleman i pa pou kapab reponn sa kestyon dan son totalite parey i ti ava anvi ou parey ki oter kestyon oubyen Lasanble ti ava anvi.

Me i ti dir toudmenm ki i ofe avek sa ka ki sa kestyon pe adrese. I ti dir sa i akoz i konsern en bout later ki pe ganny zere par Fondasyon Nasyonal pour bann Zarden Botanik. I ti fer kler ki son minister pa lwe later me i plito zere.

I ti eksplike ki ti an Mars lannen pase ki i ti resevwar en email pour enform li ki sa devloper ti pe al konmans son proze lo plot B7224 kot i ti’n ganny en lease. Apre serten resers i dir i ti realize ki sa morso later i enn ki ti ganny konsidere konman propriyete sant biodiversite Barbarons.

I dir resers ti osi montre ki tou bann lazans konsernen ti’n ganny konsilte avan ki sa alokasyon ti ganny fer e zot ti’n osi donn zot konsantman.

Sa ti osi enkli departman lanvironnman.

Me i dir ki departman lanvironnman ti’n devret fer enpe plis resers avan pran en desizyon lo sa size. Minis Cosgrow ti fer resorti ki son minister ansanm avek bann lezot lazans konsernen zot ti met zot konsern devan.

«Nou’n zwenn plizyer fwa avek bann partener e osi sa developer kot tou bann fe in ganny met devan developer e ansanm nou ti agree pour rod en alternativ e parmi ti konsern lobligasyon developer anba sa lease. In osi annan bokou kominikasyon ant minister responsab pour later ek minister responsab lanvironnman sirtou resaman apre ki nou’n aprann ki sa devloper ti pe konmans fer serten devlopman lo sa later. Minister konsernen ti rezwenn avek li avek bi pour kontinyen rod en lot solisyon,» Minis Cosgrow ti eksplike.

I dir minister konsernen ansanm avek sa developer in vizit de lezot sit resaman konman de sit alternativ e diskisyon i ankor pe kontinyen avek sa devloper.

Minis Cosgrow ti asir Lasanble ki son minister ansanm avek Fondasyon bann Zarden Botanik pou obzekte e fer sir ki pou napa okenn devlopman agrikol lo sa bout later ki’n demarke konman parti sant biodiversite.

O size si in annan tou konsiltasyon neseser, Minis Cosgrow i dir i pa pour konnen e i pa kapab dir ki 100% konsiltasyon in ganny fer lo sa size akoz i en legzersis ki devret fer par minister responsab later me i pa krwar akoz lenformasyon ki in gannyen i pa vwar pwennvi lotorite distrik.

Lo son kote, Onorab William ti dir i kler dan son larepons ki Minis Cosgrow i krwar i devret annan konsiltasyon.

I ti demande ki vreman rol minister responsab lanvironnman vizavi devlopman bann zarden biodiversite par lefe ki ti annan en plan detaye pour devlopman sa landrwa anba sant biodiversite me nou’n vwar ki sa demarkasyon in ganny fer, ki en pwa de mezir pe ganny aplike o nivo distrik kot sa menm minister pour enn i les pase me pour serten bann dimoun ki’n fer laplikasyon pour semen ki pas lo later fore lanvironnman pa pe gannyen.

Minis lo son kote ti dir sa ki li in dekouver atraver son prop resers i ki sa later ti ganny subdivide an 2012 e ki li i pa ti a-latet sa minister sa lepok e Fon Devlopman bann Zarden Botanik pa ti ni menm okouran sa subdivision. Sa later ti la e ti’n ganny klasifye anba land use plan konman ‘Forest Plantation’. Me i dir ki depi sa, Fondasyon Nasyonal pour bann Zarden Botanik in ganny met okouran e ansanm avek minister zot pe fer tou pour ki napa okenn lezot devlopman dan sa landrwa apard ki sa ki annan pour fer avek biodiversite.

Marie-Anne Lepathy